Nanawagan ang mga opisyal ng Lanao Del Sur sa pamahalaan na tiyaking hindi lamang sa opensiba kontra Maute tututok ang pagpapalawig ng martial law sa Mindanao.
Ayon kay ARMM Assemblyman at Lanao Del Sur Provincial Disaster Management Chief Zia Alonto Adiong, dapat ding maibibigay ang pangangailangan ng mga nagsilikas na residente ng Marawi City.
Bagama’t bukas ang mga mamamayan ng lalawigan sa hirit ni Pangulong Rodrigo Duterte na palawigin pa ang deklarasyon sa Mindanao, sinabi ni Adiong na mahalaga pa rin na mailatag muna ang recovery plan para sa Marawi City.
Pinaka-kailangan ngayon ayon kay Adiong ay ang maibalik sa normal ang pamumuhay ng mga residente na apektado ng bakbakan sa Marawi sa ilalim ng batas militar.
By: Jaymark Dagala
Limang construction workers ang sugatan matapos bumigay ang ginagamit na coping beam sa bahagi ng itinatayong Skyway Project sa Makati City.
Kinilala ng mga awtoridad ang mga biktima na sina Normal Nicolas, Ronald Degamo, Jerwin Deocarisa, JR Balaquidan at Guillermo Santos Jr.
Ayon sa traffic management head ng Skyway na si Ely Dela Cruz, pasado alas 9:15 kahapon ng umaga nang mangyari ang aksidente.
Dalawang sasakyan pa aniya ang nadamay matapos mabagsakan ng mga bakal na nagresulta naman sa napakabigat na daloy ng trapiko sa magkabilang panig ng Osmeña Highway.
Sa ngayon, normal na muli sa daloy ng trapiko sa naturang kalsada habang patuloy naman ang isinasagawang imbestigasyon sa nangyaring aksidente.
Pagtitiyak naman ng pamunuan ng Skyway, papalitan nila ang mga nasirang bakal sa ginagawang kalsada upang hindi magkaroon ng aberya sa integridad sa ginagawang proyekto.
By: Jaymark Dagala
Mananatiling normal ang operasyon ng NCRPO o National Capital Region Police Office tulad na lang ng kanilang ginagawa tuwing may malalaking okasyon.
Ito ang pagtitiyak ni NCRPO Chief Dir. Oscar Albayalde sa kabila ng bantang pag-atake ng mga miyembro ng Partido Komunista ng Pilipinas – Bagong Hukbong Bayan bilang pagtutol sa pagpapalawig ng martial law sa Mindanao.
Ayon kay Albayalde, wala silang nakikitang anumang banta ng terorismo lalo na sa papalapit na ikalawang SONA o State of the Nation Address ni Pangulong Rodrigo Duterte sa Hulyo 24.
Una nang inihayag ng NCRPO na tinatayang nasa 6300 pulis ang kanilang ipakakalat sa mismong araw ng SONA na mas mataas kumpara sa 4000 na kanilang ipinakalat nuong isang taon.
By: Jaymark Dagala
Kasado na ang inilatag na seguridad ng NCRPO o National Capital Region Police Office para sa Ikalawang SONA o State of the Nation Address ni Pangulong Rodrigo Duterte sa Hulyo 24.
Pero ayon kay NCRPO Chief Dir. Oscar Albayalde, hindi tulad ng mga nakalipas na SONA, hindi sila magbabarikada para harangin ang mga militante na magsasagawa ng kanilang pagkilos sa nasabing araw.
Sa halip aniya, palalapitin pa nila ang mga ito mula 15 hanggang 20 metro sa Batasan Complex alinsunod na atas sa kanila ng Office of the President.
Pagtitiyak pa ni Albayalde, maximum tolerance ang kanilang paiiralin sa kabuoan ng SONA ng Pangulo kaya’t pinagbawalan niyang magdala ang mga pulis ng mga baril, kalasag at baton.
Wala rin aniyang ipoposteng container van ngunit maglalagay sila ng mobile jail sa lugar sakaling may manggulo o lalabag sa batas sa nasabing araw.
By: Jaymark Dagala
Hinimok ni dating Land Transportation Franchising and Regulatory Board Chairman Winston Ginez ang ahensya na pakinggan ang hinain ng mga Uber at Grab user sa gitna ng crackdown ng gobyerno laban sa mga ride-sharing service.
Ayon kay Ginez, di hamak naman na mas ligtas at komportable ang pagsakay sa mga Transport Network Vehicle Service tulad ng Grab at Uber sa panahong pinu-putakte ng matinding traffic ang Metro Manila at ilang karatig lugar.
Ipinaliwanag ni Ginez na ipinatupad sa panahon niya bilang LTFRB Chairman ang Memorandum Circular na nagpapahintulot at nagre-regulate sa operasyon ng mga T.N.V.S. bilang common carrier.
Sa halip anya na papuri dahil sa magandang resulta at epekto sa mga mananakay ng operasyon ng mga T.N.V.S. bilang “game-changing reform” sa transport industry, pawang mga kaso at reklamo ang natanggap ng Grab at Uber.
By: Drew Nacino
Kinumpirma ni AFP Chief of Staff, Gen. Eduardo Año na hindi itinuturing na teroristang grupo ang Turkish Movement na Fethullah Gulen.
Ito ang nilinaw ni Año taliwas sa pahayag ni Turkish Ambassador Esra Cankorur na isa umanong terror group ang Fethullah Gullen Movement.
Ayon kay Año, ang naturang organisasyon ay tumutulong sa mga mamamayan lalo sa mahihirap na komunidad pagdating sa edukasyon.
May sarili naman anyang batayan ang embahador kung bakit tinukoy na teroristang grupo ang fethullah Gulen lalo’t inuugnay ito sa tangkang kudeta sa Turkey noong isang taon.
Gayunman, ipinunto ng heneral na panloob itong usapin ng Turkey kaya’t hindi nila nais maipit ang Pilipinas.
By: Drew Nacino
Naghain ng not guilty plea sa kasong graft si dating L.R.T.A. Administrator Melquiades Robles kaugnay sa maanomalya umanong 12.8 Million Peso maintenance at janitorial contract noong 2009.
Personal na dumalo si Robles sa itinakdang arraignment sa Sandiganbayan Fifth Division, kahapon.
Nagpatuloy ang pagbasa ng sakdal kahit una ng napatunayan ng anti-graft court na walang merito sa motion for judicial determination of probable cause ni Robles sa kanyang kaso.
Iginiit ni Robles na walang probable cause upang idiin siya ng Korte sa kasong Graft hinggil sa umano’y maanomalyang venture contract ng gobyerno sa Comm Builders and Technology Philippines, PMP Incorporated at Gradski Soabracaj Gras.
By: Drew Nacino / Jill Resontoc
Itinanggi ng National Capital Regional Police Office ang patutsada ni Senador Richard Gordon na walang ginagawa ang pulisya sa mga kaso ng pagpatay ng riding-in-tandem sa bansa.
Ayon kay N.C.R.P.O. Chief, Director Oscar Albayalde, sa 94 na kaso ng pagpatay ng riding-in-tandem sa Metro Manila sa nakalipas na isang taon, 68 suspek na ang kanilang naaresto habang 43 ang napatay.
Karamihan anya sa mga suspek at biktima ay kapwa sangkot sa iligal na droga.
Batay naman sa tala ng P.N.P. mula noong July 1, 2016 hanggang June 2017, higit 3000 kaso na ng pagpatay ng riding-in-tandem ang kanilang naitatala sa buong bansa.
Kabilang dito ang mahigit 230 naarestong suspect habang 79 ang napatay.
By: Drew Nacino / Jonathan Andal
