June 2026

Hindi kumbinsido ang Court of Appeals o CA na aktwal na napagkaitan ng kanyang kalayaan ang Pork Barrel Fund Scam Whistleblower na si Benhur Luy habang siya ay nananatili sa isang   retreat house sa Makati City.

Ito ang isa sa ipinunto ng CA sa desisyon nito na baligtarin ang hatol na guilty laban kay Janet Lim Napoles sa kasong serious illegal detention.

Batay umano  sa mga nakalap na ebidensya, mismong si  Luy pa ang humiling na mapasailalim sa spiritual retreat sa bahay sa San Jose at sa ng kanyang panananatili ay hindi nito  naisip na tumakas at hindi rin nasabi sa iba ang kanyang sitwasyon.

Nakapagtataka anila na sa mga okasyon na nakalalabas ng retreat house si  Luy  ay hindi rin umano ito humingi ng saklolo sa mga otoridad.

Ipinunto pa ng CA na nang gawin ang rescue operation kay Luy noong March 2013, siya ay nagpumiglas na sumama sa mga miyembro ng NBI o National Bureau of Investigation  at sinabi pa na walang ginawang iligal laban sa kanya si Reynald Jojo Lim na kapatid ni Janet Napoles at isa rin sa mga akusado sa kaso.

Sumulat ng desisyon ng kaso si CA 12th Division Chairman Normande Pizzaro at sinangayunan naman ng mga miyembro na sina Aj Samuel Gaerlan at Jhosep Lopez.

DOJ planong gamitin si Napoles bilang testigo sa muling pagbubukas ng imbestigasyon sa PDAF Scam

Irerespeto umano ng Department of Justice o DOJ ang desisyon ng Court of Appeals na absuweltuhin si Janet Lim Napoles sa kasong serious illegal detention.

Ayon kay Justice Secretary Vitaliano Aguirre, wala namang magiging problema kung ang pinagbatayan ng Court of Appeals ay ebidensya.

Nauunawaan umano niya na kailangang maging patas ang Appellate Court sa lahat.

Idinagdag pa ni Aguirre na plano nilang gamitin si Napoles bilang testigo sa muling pagbubukas ng imbestigasyon sa PDAF Scam kung makikipagtulungan si Napoles.

Sa ilalim ng Section 21, Article 3 o Bill of Rights ng 1987 Constitution, dahil sa pagpapawalang sala ng CA kay Napoles, hindi maaring isalang muli sa prosekusyon ang isang tao para sa kaparehong paglabag at parehong sirkumstansya alinsunod sa prinsipyo na nagbabawal sa double jeopardy.

By Drew Nacino |With Report from Bert Mozo

Walang dapat ikatakot ang mga deboto ng Itim na Nazareno at nagsisimba sa Quiapo Church, sa Maynila.

Ito ang tiniyak ni Philippine National Police o PNP Chief, Director. General Ronald “Bato” Dela Rosa matapos bulabugin ng magkasunod na pagsabog ang bahagi ng Quiapo noong Sabado.

Ayon kay Dela Rosa, may sarili namang security measures na ipatutupad ang pamunuan ng simbahan ng Quiapo bukod sa seguridad na inilalatag ng Manila Police District o MPD.

Katunayan anya ay minsan ng pinuputol  ang cellphone signal sa simbahan ng Quiapo at dahil sa insidente ay asahan na ang mas mahigpit na seguridad sa nasabing lugar.

Pabiro namang sinabi ni Bato na i-urong na lamang sa Huwebes ang simba sa Quiapo dahil alam na ng lahat na Biyernes ito dinaragsa ng mga deboto.

Dela Rosa pinayuhan ang mga courier service na mag-ingat vs sa mga kontrabando

Pinayuhan ni PNP Chief, Dir. Gen. Ronald Dela Rosa ang mga courier service o mga nagde-deliver ng package na mag-ingat laban sa mga kontrabando o iligal na bagay.

Ito’y matapos ang magkasunod na pagsabog sa Quiapo, Maynila kung saan ang bomba na ginamit ay ipinadala sa pamamagitan ng grab express ang delivery service ng riding application na grab.

Ayon kay Dela Rosa, makabubuti kung tatanunging maigi ng courier ang taong nagpapadala kung ano ang laman ng package para matiyak na walang droga o bomba sa loob nito.

Sa ngayon ay tinutunton anya nila ang nagpadala ng improvised explosive device gamit ang datos na nasa grab app.

“On-going ang follow-up natin dyan, to a certain, may pangalan eh, may pangalan ng babae yung cooler eh ng nagtawag, pangalan ng babae eh, ah Hya? Hannah? O kung ano”, pahayag ni General Bato.

Gen. Bato tiniyak na hindi binubulsa ang malaking intel fund ng PNP

Tiniyak ni PNP Chief, Dir. Bato Dela Rosa na nagagamit ng maayos ang intelligence fund ng pambansang pulisya.

Ito’y makaraang  kwestyunin ni Senate President Koko Pimentel kung bakit hindi napigilan ng mga otoridad ang mga pagsabog sa Quiapo, Maynila gayong may malaking intel fund  na inilaan para sa intelligence gathering.

Ayon kay General Bato, hindi nila binulsa ang intel fund dahil ginagamit  ito sa pag-momonitor sa mga threat group sa bansa at hindi sa mga personal na away sa mga komunidad.

Dahil dito, hiningi na ng pnp ang tulong ng mga mamamayan para magbantay at mapigilang maulit ang mga ganitong klaseng banta.

By Drew Nacino |With Report from Jonathan Andal

Magsisimula na ang Judicial and Bar Council (JBC) sa  pagsala ng mga aplikante para sa mababakanteng pwesto sa Supreme Court O SC.

Umaabot na sa labindalawa (12) ang mga aplikante para sa babakantehing posisyon sa SC ni Associate Justice Bienvenido Reyes na umabot na sa mandatory retirement na 70 years old  sa  July 16.

Kabilang naman sa mga posibleng pagpipiliang magiging susunod na mahistrado ng Korte Suprema ay sina Supreme Court Chief Administrator Midas Marquez;

Ilang justices ng Court of Appeals (CA), sa pangunguna ni AJ Japar Dimaampao at walong (8) iba pa kabilang ang isang Regional Trial Court (RTC) Judge ng Pasig na si Judge Rowena Apao-Adlawan  at   Vice Dean ng Centro Escolar University College of Law na si Atty. Rita Linda Ventura Jimeno.

Inaasahang daraan sa mabusising public interview ang mga aplikante bago maglabas ng shortlist ang JBC na pagpipilian ng Pangulo maliban na lamang sa ilang nominadong  epektibo pa ang  naunang public interview na balido sa loob ng  isang taon.

SC nagtalaga ng mga korteng dirinig sa lumulobong cyber-crime cases

Nagtalaga na ang Supreme Court o SC ng mga korteng dirinig sa lumulobong cyber-crime cases at mga kahalintulad na paglabag.

Sa full court ruling ng SC, itinalaga nito ang ilang branch ng mga Regional Trial Court (RTC) upang i-prayoridad ang mga cyber-crime case sa ilalim ng Republic Act 10715 o Cyber-Crime Prevention Act of 2012.

Batay sa kautusan ng high tribunal, magsisilbing cyber-crime court ang mga RTC Branch na itinalagang Special Commercial Court na binuo noong June 17, 2003.

Ang mga nasabing Korte sa judicial region ay binigyan ng territorial authority sa buong rehiyon.

Ipina-alala naman ng Korte Suprema sa mga litigant na ang mga kaso  ay dapat isampa sa Office of the Clerk of Court sa mga official station ng mga proper cyber-crime court.

By Drew Nacino |With Report from Bert Mozo

Nakatakdang bumiyahe  si Pangulong Rodrigo Duterte sa   Cambodia, Hongkong at China, simula sa Miyerkules.

Ayon kay Foreign Affairs Spokesman Robespierre Bolivar,  dadalo si Pangulong Duterte sa world Economic Forum for ASEAN sa May 10 hanggang 11.

Inaasahang magsasalita ang Pangulo sa naturang pulong kasama ang dalawampu’t lima (25) pang Heads of State.

Matapos nito ay lilipad si Duterte sa Hongkong upang kumustahin  ang mga Overseas Filipino  at saka di-diretso sa Tsina sa May 13 upang dumalo naman sa “One Belt, One Road Forum” na tatagal ng tatlong (3) araw.

By Drew Nacino |With Report from Aileen Taliping

Walang plano si Philippine National Police o PNP Chief, Director General Ronald  Dela Rosa na sibakin sa puwesto sina National Chief,  Director Oscar Albayalde at  Manila Police District o MPD  Director, Chief Supt. Joel Coronel matapos ang dalawang  pagsabog sa Quiapo, Maynila  na ikinasawi ng dalawa (2) katao.

Ito’y kahit pa naka strike 3 na ang MPD sa magkakasunod na insidente ng pagsabog matapos ang  unang pagsabog noong April 28 sa kasagsagan ng ASEAN Summit at ang nadiskubreng secret jail.

Ayon kay Dela Rosa,  hindi  maituturing na kapabayaan ng mga pulis ang nangyaring pagsabog sa Quiapo dahil hindi naman  ito kagagawan ng mga teroristang grupo kundi personal na away lamang.

Hindi naman  anya mababasa ng mga pulis kung anong nasa isip ng mga magkakaaway.

Dagdag pa ni Bato,  hindi rin maaaring ikumpara ang kaso nina Albayalde at Coronel sa kaso  ng Provincial Director ng Cagayan Province at Regional Director ng Pro-2 na sinibak matapos ang pag-atake ng NPA sa presinto sa Amulong, Cagayan at   Maddela, Quirino.

AFP tumutulong na sa imbestigasyon ng magkasunod na pagsabog sa Quiapo, Maynila

Tumutulong na rin ang Armed Forces of the Philippines o AFP sa imbestigasyon ng magkasunod na pagsabog sa Quiapo, Maynila na ikinasawi ng dalawang (2) katao noong Sabado.

Ayon kay AFP Public Affairs Office Chief, Col. Edgard Arevalo,  papasok sila sa proseso ng validation para mapagtibay ang mga detalye o impormasyong hawak ng Philippine National Police.

Suportado anya nila ang PNP sa counter-terrorism operations sa pamamagitan ng intelligence gathering at pagbabahagi ng mga impormasyon.

Nauna naman nang ibinasaura ng pambansang pulisya ang anggulong terorismo sa naganap na pagsabog sa Quiapo dahil batay sa kanilang imbestigasyon ay personal na away ang sanhi nito.

By Drew Nacino |With Report from Jonathan Andal

Itinanggi ni Ilocos Norte Governor Imee Marcos ang kumalat na balita sa social media na  sumakabilang buhay na ang kanyang inang si dating Unang Ginang Imelda Marcos.

Naglabas ng paglilinaw si Marcos makaraang mag-post sa kanyang Twitter Account si Bacoor Cavite Mayor Lani Mercado Revilla ng pakikidalamhati sa Pamilya Marcos dahil sa pagyao ng kanilang ina.

Agad namang binura ni Revilla ang kanyang tweet makaraang matanggap ang paglilinaw at agad ring humingi ng paumanhin sa Pamilya Marcos.

By Len Aguirre