June 2026

Irerekomenda ni Agriculture Secretary Manny Piñol ang pagtatayo ng istruktura sa Benham Rise.

Ginawa ng kalihim ang pahayag matapos ang tatlong araw na paglalayag sa nasabing karagatan.

Ipinaliwanag ni Piñol na napatunayan nilang mayaman sa lamang-dagat ang Benham Rise kung kaya’t dapat itong protektahan laban sa mga dayuhan na illegal na mangingisda sa nasabing lugar.

Sinabi ni Piñol na nais nilang magtayo ng pasilidad sa Benham Park, ang pinakamababaw na bahagi ng Benham Rise, para magsilbing research center para sa mga marine scientist, pagdadaungan ng mga lokal na mangingisda, pagtatayo ng ice making plant para mapanatiling sariwa ang mga huling isda, magsisilbing station din ito ng coast guard at puwedeng maglagay ng weather radar station.

Naglagay na rin ng inisyal na 15 payao ang Bureau of Fisheries and Aquatic Resources sa rehiyon.

Ang Benham Rise ay may 13 Milyong ektaryang underwater plateau na may 5,000 ang lalim  mula sa ibabaw ng karagatan at may 43 porsiyento ang nahuhuling isda at dinadala sa may  Dinahican Port sa Infanta, Quezon.

By: Meann Tanbio

Suportado ni Senate Minority Leader at CA Member Franklin Drilon ang panawagan nina Senador Panfilo Lacson at Congresswoman  Josephine Sato  na imbestigahan ang isiniwalat ni Pangulong Rodrigo Duterte na Lobby Money Talks o may gumana umano na lobby money kaya na-reject ang appointment ni Gina Lopez sa Commission on Appointments,

Ayon kay Drilon, dapat na mag-iniate ng imbestigasyon sa naturang usapin si Senate President Aquilino “koko” Pimentel bilang chairman ng C.A.

Iginiit ni Drilon na mahalagang maimbestigahan ang naturang isyu dahil nakakaaapekto ito sa integridad ng bawat miembro ng CA at sa buong CA mismo

Bilang tugon, sinabi ni Pimentel na handa niyang paimbestigahan sa CA mismo ang naturang isyu pero kailangan daw muna niyang makakakalap ng ebidensya

Ayon kay Pimentel, kailangang magkaroon muna ng mas credible na ebidensya  at hindi  verbalized theory lang.

By: Meann Tanbio / Cely Bueno

Kumpiyansa ang Malakanyang na hindi makapagpapahina sa  kinakaharap na kasong plunder ni Pork Barrel Scam Queen Janet  Lim Napoles  ang  pagka-abswelto  ng  kanyang  kasong  serious  illegal detention sa Court  of  Appeals.

Sinabi ni  Chief  Presidential Legal Counsel Salvador  Panelo na  malakas  ang  kaso ng  gobyerno   laban  kay Napoles  sa mga  kasong  plunder  na  kinakaharap nito.

Ang  mga  kasong  plunder na  kinakaharap  ni Napoles  ay  may  kinalaman sa milyon milyong  Pisong nakubra  umano nito sa  Pork Barrel Funds ng  mga  Senador  at  Kongresista  na  idinaan sa mga  pekeng  foundations  at mga programa.

Dagdag pa ni Panelo, wala  ring  dapat  na  ipag-alala ang publiko sa posibilidad  na palitawing  “polluted witness” si Benhur  Luy ng  kampo ni Napoles   sa  kasong  plunder  dahil magkakaroon  aniya  ng  corroborative  documents  at  corroborative  witnesses.

By: Meann Tanbio / Aileen Taliping

Binatikos  ng  Malakanyang  ang  Commission on Human Rights  dahil sa  pagiging  “selective” sa  mga  kasong hinahawakan at  iniimbestigahan.

Sinabi ni Chief Presidential Legal Counsel Atty. Salvador  Panelo na kapansin-pansin na kapag pulis  o sundalo ang  napatay ng  mga  kriminal habang  ginagampanan  ang  tungkulin ay  hindi nag-iimbestiga  ang  CHR.

Idinagdag pa ni Panelo na ang tanging interes ng CHR  ay  mga  miyembro ng  Abu Sayyaf  Group na napatay, extra  judicial killings  at  mga  kritikal.

Matatandaang  inihayag  ng  CHR  Region 7  na  iimbestigahan nila  ang  napatay  na  Abu Sayyaf sa  Bohol dahil sa  paniwalang sinadyang  itinumba  ng  mga  pulis  ang  bandido at  hindi  ito  nagtangkang  mang-agaw ng  baril  gaya  ng  naging  pahayag  ng  mga otoridad.

By: Meann Tanbio / Aileen Taliping

Itinalaga ng Malakanyang si Nestor Espenilla bilang bagong Governor ng Bangko Sentral ng Pilipinas.

Papalitan ni Espenilla si outgoing BSP Governor Amando Tetangco Jr.

Si Espenilla ay nagsilbing BSP Deputy Governor sa loob ng 6 na taon.

Inanunsyo ni Pangulong Rodrigo Duterte ang appointment ni Espenilla sa 15th cabinet meeting na ginanap sa Malakanyang kahapon.

Sinabi ni Finance Sec. Carlos Dominguez na ang pagpili ng bagong BSP Governor ang isa sa mga importanteng appointment na ginawa ng Pangulo.

By: Meann Tanbio / Aileen Taliping

Hinamon ng Archdiocese of Cagayan de Oro City ang gobyerno na pairalin ang restorative of justice sa halip na vindictive justice tulad ng panukalang batas na bubuhay sa parusang kamatayan.

Ayon kay Cagayan de Oro Archbishop Antonio Ledesma, ito ang dapat isulong na alternatibo ng pamahalaan sa halip na patawan ng  bitay ang mga nagkasala sa lipunan.

Nanawagan naman ng suporta at pakikiisa si Ledesma sa isasagawang “Lakbay Buhay  March Caravan” laban sa death penalty na tatagal ng dalawampu’t isang (21) araw sa pangunguna ng multi-sectoral groups at Catholic Bishops Conference of the Philippines o CBCP.

Mayo 4 nang simulan ang 21 day lakbay buhay pilgrimage caravan sa CDO na magtatapos naman sa Mayo a24 sa Senado sa Pasay City.

Iginiit ng Arsobispo na hindi lamang mga senador at kongresista ang dapat maimulat ang isip sa naturang usapin kundi maging ang mga mamamayan na patuloy na naniniwalang pagbabalik ng death penalty ang solusyon sa kriminalidad.

By Drew Nacino |With Report from Aya Yupangco