Matapos ang halos dalawang taong paghihintay ay nagbabalik na sa music scene ang dating miyembro ng sikat na bandang ‘One Direction’ na si Harry Styles.
Una sa trending topic ngayon sa Twitter ang bagong music video ng debut single ni Harry na ‘Sign of Times’ at matapos na ilabas kahapon ay umabot na agad sa halos 3 milyong views ito sa Youtube.
Kinunan ang video sa Isle of Skye sa Scotland kung saan makikita ang mala-super hero na paglipad ni Harry gayundin ang tila paglalakad nito sa ibabaw ng tubig.
Sa isang interview, sinabi ng stunt pilot na si Will Banks na hindi ginamitan ng green screen at effects ang mga kuha kay Harry bagkus ito mismo ang lumipad ng aabot sa 1,550 feet gamit ang isang helicopter rope habang nasa shooting.
Nakatakdang ilabas ngayong Biyernes ang unang solo album ni Harry matapos na mabuwag ang kinabibilangang grupong One Direction noong 2015.
Patay ang hindi bababa sa walo (8) katao habang sugatan ang dalawampung (20) iba pa sa pag-atake ng isang suicide bomber sa sentro ng Mogadishu, Somalia.
Ayon kay Major Aden Ibrahim ng Somalia Police, ginawa ang pag-atake sa pamamagitan ng pagpapasabog ng isang kotse target ang Italian coffee cafeteria na matatagpuan malapit sa isang passport office.
Inako ng grupong Islamist militant group na Al Shabaab ang pag-atake.
Pinangangambahan naman ng mga awtoridad na tumaas pa ang bilang ng mga casualties dahil sa tindi ng pagsabog.
By Rianne Briones
Photo: Reuters
Hindi na maaari pang humawak ng alinmang posisyon sa pamahalaan ang isang kandidato na mabibigong maghain ng kanilang SOCE o statement of Contributions and Expenditure ng dalawang beses.
Ito’y makaraang pagtibayin ng Korte Suprema ang iginawad na perpetual disqualification ng COMELEC o Commission on Elections laban kay Joel Maturan ng Basilan.
Batay sa desisyong pinonente ni Justice Lucas Bersamin, nabigo si Maturan na maghain ng kanyang SOCE nang tumakbo ito sa pagka-gobernador ng Basilan noong 2010 at sa pagka-alkalde noong 2013.
Ngunit inireklamo si Maturan nang muli itong maghain ng kanyang kandidatura noong taong 2015 at kalauna’y pinatawan ng kaparusahan ng COMELEC.
Giit ni Justice Bersamin, lubhang kinakailangan ang paghahain ng SOCE sa ilalim ng Republic Act 7166 o ang synchronized national and local elections.
By Jaymark Dagala
Kinontra ng grupong Karapatan ang appointment ni dating AFP o Armed Forces of the Philippines Chief of Staff Roy Cimatu bilang DENR o Department of Environment and Natural Resources Secretary.
Ayon kay Karapatan Secretary General Cristina Palabay, ang appointment ni Cimatu ay patunay ng militarization ng civilian bureaucracy dahil ang bagong DENR Secretary ay mukha ng war against terror ng Arroyo administration.
Partikular na tinukoy ni Palabay ang papel ni Cimatu bilang pinuno ng AFP Southern Commander mula September 2001 hanggang May 2002 at akusahang ilang Basilan residents bilang miyembro ng abu Sayyaf.
Ilan aniya sa mga iligal na inaresto ay nananatili pa rin sa mga kulungan.
Matatandaang nanumpa na bilang bagong kalihim ng DENR si Special Envoy to the Middle East at dating AFP Chief of Staff Roy Cimatu.
Ito’y makaraang italaga ni Pangulong Rodrigo Duterte si Cimatu bilang kapalit ni dating DENR Secretary Gina Lopez na ni-reject ng makapangyarihang Commission on Appointments.
Kinumpirma ni Executive Secretary Salvador Medialdea ang ginawang pagtatalaga ng Pangulo kay Cimatu makaraang ianunsyo mismo ito ng Punong Ehekutibo sa ginawang cabinet meeting kahapon.
Una munang naglingkod si Cimatu bilang hepe ng Sandatahang Lakas ng Pilipinas nuong panahon ni dating Pangulong Gloria Macapagal Arroyo kapalit ng ngayo’y National Security Adviser Hermogenes Esperon.
Dalawang beses din itinalaga si Cimatu bilang special envoy sa Gitnang Silangan, una ay noong panahon ng administrasyong Arroyo at nakabalik sa ilalim ng kasalukuyang administrasyon.
By Judith Larino | Jaymark Dagala
*Malacañang Photo
Lusot na sa ikalawang pagbasa sa Senado ang panukalang batas na nagpapalawig sa validity ng mga pasaporte ng hanggang sa sampung taon.
Layon nitong gawing mas mabilis ang pagpo-proseso sa mga pasaporte at upang bawasan ang napakahabang pila sa mga consular offices ng DFA o Department of Foreign Affairs.
Tiniyak naman ni Senate Committee on Foreign Relations Chairman Alan Pete Cayetano na kanilang maipapasa ang nasabing batas bilang bahagi ng mga pagbabagong nais ipatupad ni Pangulong Rodrigo Duterte.
Batay sa tala ng DFA, nasa tatlong milyong aplikasyon ang naproseso ng DFA para sa mga bagong pasaporte gayundin ang renewal o di kaya’y replacement sa mga nawalang pasaporte mula nuong isang taon.
By: Jaymark Dagala
Labas umano sa kapangyarihan ng Senado at Kamara ang independent constitutional body na Commission on Appointments kaya’t hindi nila ito maaaring basta-basta imbestigahan.
Ito ang tugon nila Senate Majority Leader Tito Sotto at Senador Panfilo Lacson kasunod ng mga panawagang imbestigahan ang CA dahil sa pagkakabasura ng nominasyon ni Gina Lopez bilang kalihim ng DENR o Department of Environment and Natural Resources.
Una nang nagpahayag ng kaniyang intensyon si Magdalo Partylist Rep. Gary Alejano na maghain ng resolusyon sa Kamara para imbestigahan ang makapangyarihang komite dahil sa pahayag ni Pangulong Rodrigo Duterte na lobby money ang dahilan kaya’t hindi kinumpirma si Lopez.
Una nang nanawagan ang ilang grupo sa mga Senador na repasuhin ang isa sa mga rules ng komite partikular na ang secret balloting ng mga miyembro ng C-A dahil sa posibilidad ng paggulong ng salapi mula sa mga grupo o kumpaniyang nasagasaan ni Lopez nuong siya pa ang nakaupong kalihim.
By: Jaymark Dagala
Tinawanan lamang ni Ilocos Norte 2nd District Rep. Imelda Romualdez Marcos ang kumalat na balita sa social media na yumao na siya.
Kahapon, masigla pang nakipagkuwentuhan si Ginang Marcos sa mga miyembro ng media makaraang dumalo sa sesyon ng mababang kapulungan.
Una rito, umalma ang anak ng dating unang ginang na si Ilocos Norte Governor Imee Marcos sa tweet ni Bacoor Mayor Lani Mercado – Revilla na nagpapaabot ng pakikiramay sa pagyao ng kongresista.
Kasunod nito, nagbiro pa si Ginang Marcos na dahil sa nangyari, tiyak na hahaba pa ang kaniyang buhay upang makapaglingkod pa sa taumbayan ng mahabang panahon.
By: Jaymark Dagala
Binati ni Pangulong Rodrigo Duterte si Emmanuel Macron sa pagkakapanalo nito bilang bagong Pangulo ng France.
Tinalo ni Macron si Far Right Nationalist Marine Le Pen sa katatapos na Presidential Elections.
Ayon kay Presidential Spokesman Ernesto Abella, umaasa si Pangulong Rodrigo Duterte na lalo pang iigting ang bilateral relations ng Pilipinas at France sa ilalim ng administrasyon ni Macron.
Idinagdag pa ni Abella na malaking trading partner ng Pilipinas ang France sa European Union.
By: Meann Tanbio
Sinibak si Davao Del Norte Representative Antonio “tonyboy” Floirendo Jr. Bilang miyembro ng CA o Commission on Appointments.
Kasunod ito ng pagliban sa sesyon ni Floirendo nang magbotohan sa Kamara para sa death penalty bill.
Sa sesyon kahapon, pinalitan si Floirendo ni Isabela Representative Rodito Albano na umalis na sa Nacionalista Party para lumipat sa PDP-Laban.
Kapalit naman ni Albano si Zamboanga Del Norte Rep. Seth Frederick Jalosjos bilang kinatawan ng Nacionalista Party sa C.A.
Nabatid na si Floirendo na kaaway ngayon ni House Speaker Pantaleon Alvarez.
Nagkaroon ng sigalot sa pagitan nina Floirendo at Alvarez dahil sa kaso ng TADECO o Tagum Agricultural Development Company na may kasunduan sa BUCOR para upahan ang Davao Penal Colony.
By: Meann Tanbio / Jill Resontoc