Inabswelto na ng Sandiganbayan 5th Division si dating Palawan Governor Joel Reyes sa kanyang kasong graft kaugnay sa multi-milyong pisong fertilizer fund scam.
Ito ay matapos niyang igiiit ang kanyang karapatan para sa mabilis na paglilitis kaugnay sa kaso, na inabot ng labing dalawang (12) taon para maihain.
Una nang pinagbigyan ng korte ang motion to quash na inihain ng kanyang mga kasama sa kaso na sina Department of Agriculture Regional Technical Director Rodoldo Guieb at Regional Executive Director Dennis Araullo dahil din sa parehong dahilan.
Kaugnay nito, nanindigan ang Sandiganbayan 5th Division sa pag-abswelto kay Reyes sa kasong graft.
Ayon kay Sandiganbayan Associate Justice Rafael Lagos, na nagdesisyon sa graft case, nagtagal ng tinatayang labindalawang (12) taon bago ihain ang kaso sa Anti-Graft Court.
Isinampa anya ang kaso sa Office of the Ombudsman noong 2004 at September 14, 2016 lamang inihain sa Sandiganbayan o nagkaroon ng labindalawang (12) taong delay.
Ipinaliwanag ni Lagos na nilabag ng Ombudsman ang probisyon ng article 3, section 16 ng Saligang Batas o speedy disposition of cases.
Nilabag din ng tanod bayan ang karapatan ng akusado sa ilalim ng Article 3, Section 16 kaya’t nabasura ang kaso.
By Katrina Valle | Drew Nacino / with report from Jill Resontoc (Patrol 7)
Nasa apatnapung (40) miyembrong bansa ng UNHRC o United Nations Human Rights Council ang nagpahayag ng pangamba sa ‘extrajudicial killings’ sa bansa.
Itoy makaraang ilatag ni Senador Alan Peter Cayetano sa UNHRC ang datos hinggil sa estado ng karapatang pantao sa Pilipinas.
Ayon sa kinatawan ng Estados Unidos at Australia, mahalagang maimbestigahan ang mahigit sa pitong libong (7,000) kamatayan na iniuugnay sa giyera kontra droga ng pamahalaan ng Pilipinas lalo na’t hindi maipaliwanag kung sino ang may kagagawan nito.
Nanawagan naman sa pamahalaan ng Pilipinas ang Canada na wakasan na ang extrajudicial killings, sapilitang pagkawala, iligal na pag-aresto at pagkulong gayundin ang torture at harassment.
Inirekomenda naman ng France na abandonahin na ng Pilipinas ang isinusulong na pagbuhay sa parusang kamatayan.
Kabilang pa sa mga bansang nagpahayag ng pangamba sa extrajudicial killings at nanawagan ng imbestigasyon ang Germany, United Kingdom at ang Holy See.
Tanging ang China ang nagpahayag ng suporta sa giyera kontra droga ng Duterte administration dahil kaaway umano ng sanlibutan ang illegal drugs.
Visit PH
Kaugnay nito ay inimbitahan ni Cayetano ang mga miyembrong bansa ng UNHRC na bisitahin ang Pilipinas upang matignan kung totoo ang mga paratang ng EJK o extrajudicial killings sa Pilipinas.
Ang imbitasyon ay bahagi ng presentasyon ni Cayetano sa UNHRC upang idepensa ang human rights record ng Pilipinas.
Mariing itinanggi ni Cayetano ang mga paratang na may basbas ng pamahalaan ang mga nangyaring patayan na nag-ugat sa giyera kontra droga ng Pangulong Rodrigo Duterte.
Sa pamamagitan aniya ng mekanismong ginagamit ng UNHRC, hinikayat ni Cayetano ang mga bansang miyembro ng konseho na pasyalan ang Pilipinas, puntahan ang mga komunidad at magtanong o kapanayamin ang mga mamamayan.
Sa datos na iprinisita ni Cayetano sa konseho, mayroon na anyang mahigit sa dalawang libo anim na raan (2,600) ang napatay sa mga lehitimong anti-drug operations samantalang mahigit sa syam na libo tatlong daan (9,300) ang itinuturing na kaso ng homicide o yung mga pinatay dahil sa isyu ng drugs ng mga hindi kilalang suspects.
Sa ilalim anya ng sampung (10) buwan ng Duterte administration ay nakapagsagawa na ang pulisya ng mahigit sa limampung libong (50,000) anti-illegal drugs operations kumpara sa mahigit syamnapung libong (90,000) drug operations sa anim (6) na taon ng Aquino administration.
Ito na ang ikatlong pagkakataon na sumailalim sa periodic review ng UNHRC ang estado ng karapatang pantao sa Pilipinas.
By Len Aguirre
Babantayan ng environmental groups ang mga gagawing pagkilos ng bagong talagang kalihim ng Department of Environment and Natural Resources o DENR na si retired General Roy Cimatu.
Ayon kay Abi Aguilar ng Greepeace, ikinagulat ng kanilang grupo ang bilis ng pagkakatalaga ng Pangulong Rodrigo Duterte kay Cimatu bilang kapalit ni dating Secretary Gina Lopez.
Bagamat hindi naman anya sila direktang kumokontra sa pagkakatalaga kay Cimatu, isang malaking kuwestyon para sa kanila ang kawalan nito ng track record pagdating sa pangangalaga sa kalikasan.
“Yan po ang hindi namin sigurado tungkol sa kanya, kung paano niya itatrato yung mga mining companies, anong gagawin niya sa mga naging desisyon ni Secretary Gina Lopez dati, ito ba ay kanyang pananatilihin, itutuloy, babaguhin, all together? yan po ang aming kailangan na bantayan, patuloy din naming ipapahayag na willing naman kaming makipag-trabaho.” Ani Aguilar
Kasabay nito, sinabi Aguilar na bukas ang Greenpeace na suportahan ang mga panukalang hilingin sa Pangulong Duterte na italaga na lamang bilang Undersecretary ng DENR si Lopez.
“Maganda po yan kasi si Gina Lopez ay alam naming very collaborative, for sure i-involve niya ang civil society groups pagdating sa mga trabaho ukol sa kalikasan.” Pahayag ni Aguilar
By Len Aguirre | Ratsada Balita (Interview)
*Malacañang Photo
Magpapatuloy ang pagbibigay ng Human Rights Victims Claims Board at Landbank ng cash card para sa kumpensasyon ng mga biktima ng paglabag ng karapatang pantao sa ilalim ng Martial Law.
Sinabi ni Claims Board Chairman Lina Sarmiento na kahapon ay mahigit sa tatlong daan (300) sa apat na libong (4,000) claimants ang nakakuha ng kanilang cash cards mula sa Landbank.
Para makuha ang cash card, pinayuhan ni Sarmiento ang claimant o kaya ay pamilya ng nasawing claimants na dalhin sa Landbank ang kanilang acknowldegement receipt at ids.
Ang ikalawang bahagi ng kompensasyon ay ibibigay kapag natapos nang desisyunan ang claims ng mahigit tatlumpu’t limang libo (35,000) pang biktima.
“4,000 ang inisyal na bilang ng ating bibigyan, hindi lang napapagsabay-sabay, starting next week sa mga branch ng Landbank na malapit sa kanilang mga bahay, ang importanteng malaman ng ating mga kababayan na dapat yung kopya ng resolusyon ay matanggap muna nila, una dapat kasama sila sa 4,000, pangalawa natanggap na nila, at pangatlo dapat lumagpas na yung 15 days before nila matanggap.” Pahayag ni Sarmiento
By Katrina Valle | Balitang Todong Lakas (Interview)
Photo: cnnph/gov.ph
Pumapalo na sa dalawampung (20) miyembro ng BIFF o Bangsamoro Islamic Freedom Fighters ang nasawi at pitong (7) sundalo ang sugatan sa pinalakas na operasyon ng militar sa lalawigan ng Maguindanao.
Ayon kay 6th Infantry Division Public Affairs Chief Captain Ervin Encinas kabilang sa nasawi si Kumander Khalid na pamangkin ni Shiek Esmail Abubakar alias Kumander Bungos.
Sapul sa inilunsad na airstrikes at artillery assaults ng militar ang kuta ng BIFF sa SPMS o Shariff Aguak, Pagatin, Mamasapano and Salibo box kung saan partikular na tinatarget bukod kay Kumander Bungos ay sina Shiek Abdul Malik alias Kumander Turaifie ng BIFF local ISIS, Salahuddin Hassan alias Kumander Orak at anim (6) na Indonesian terrorists
Suwerte namang nakaligtas ang mga nagpapatrolyang sundalo sa Barangay Pagatin, Datu Salibo at Datu Hoffer sa Ampatuan, Maguindanao sa magkasunod na pagpapasabog ng IED ng BIFF sa convoy ng mga awtoridad.
By Judith Larino
Pinag-aaralan na kung saan umano uubrang gawin ang bakbakang Canelo Alvarez-Golovkin.
Ayon ito kay Oscar dela Hoya matapos siya aniyang tumanggap ng mga tawag mula sa ibat ibang bahagi ng bansa para isulong ang showdown nina Saul Canelo Alvarez at Gennady Golovkin.
Sinabi ni Dela Hoya na ang mga natanggap niyang tawag mula sa Dubai gayundin sa United Kingdom at iba pang bansa ay patunay na marami ang interesado sa sagupaan nina Alvarez at Golovkin sa boxing ring.
Kabilang sa posibleng venue sa Amerika para sa bakbakan sa September 16 ang Las Vegas at AT&T Stadium sa Dallas.
Nuong isang taon ay tinalo ni Alvarez si liam Smith ng Britain sa Texas venue kung saan nanOod ang mahigit limampung libo (50,000) katao.
By Judith Larino
Kinumpirma ng Armed Forces of the Philippines o AFP na walong (8) dayuhang terorista ang kasalukuyang nasa bansa.
Sa isang briefing sa House of Representatives kahapon, ipinabatid na ilan sa naturang mga banyagang terorista ay Indonesian, Malaysian at Singaporean.
Ayon kay AFP Brig. General Felimon Santos Jr., natuklasan din ng Malaysian authorities na ang Sabah ay ginagamit na transhipment point ng mga teroristang papasok sa Pilipinas.
Samantala, sinabi naman ni AFP Chief of Staff Eduardo Año, nagtangka ang ASG o Abu Sayyaf Group na magpakawala ng tinatawag na sleepers sa labas ng Central Mindanao para palabasin na malawak ang kanilang presensya.
Aniya maging ang Metro Manila ay nananatiling palaging target ng ASG na pamugaran subalit hindi naman nakakalusot sa mga awtoridad.
Base sa intelligence report ay nananatili lamang sa Central Mindanao partikular sa Lanao ang naturang mga terorista.
By Rianne Briones
Handa si pork barrel queen na maging state witness laban sa mga opisyal na gobyerno na sangkot sa multi-bilyong pisong pork barrel fund scam.
Kasunod ito ng pagpapa-walang sala sa kanya ng Court of Appeals sa kasong illegal detention.
Ayon kay Atty. Stephen David, abogado ni Napoles, handa ang kanyang kliyente na sabihin ang lahat ng nalalaman nito sakaling hilingin ito ng gobyerno.
Kasabay nito, ihihirit aniya ni Napoles na mailipat ito sa house arrest habang dinidinig ang kasong multiple plunder kaugnay sa PDAF o Priority Development Assistance Fund scam dahil sa matinding security risk.
By Rianne Briones
Idinepensa ng Philippine delegation sa harap ng United Nations Human Rights Council ang mga nagaganap na patayan sa bansa kasunod ng kampanya laban sa iligal na droga ng Duterte administration.
Pinangunahan ni Senador Alan Peter Cayetano at Deputy Executive Secretary Menardo Guevarra ang pagharap sa halos isang daang (100) kinatawan ng iba’t ibang bansa na miyembro ng UN.
Dito ay iginiit ni Cayetano na mataas ang pagrespeto ng pamahalaan sa karapatang pantao.
Sinabi ni Cayetano na hindi state sponsored ang mga nangyayaring pamamaslang sa halip ay resulta ito ng mga krimen na ginagawa ng mga gumagamit ng iligal na droga.
PAKINGGAN: Bahagi ng pahayag ni Senator Alan Peter Cayetano