June 2026

Sinimulan na ng CHED o Commission on Higher Education ang proseso sa pag-amiyenda sa isang probisyon ng IRR o Implementing Rules and Regulations.

Kaugnay ito sa pagpapatupad ng Free Tuition Fee Policy para sa mga mag-aaral ng State Colleges and Universities para sa kasalukuyang school year.

Ayon kay CHED Commissioner Prospero De Vera, layon nitong matiyak na tanging ang mga mahihirap ngunit karapat-dapat na mga mag-aaral lamang ang masasaklaw ng nasabing programa.

Paliwanag ni De Vera, nakabatay aniya sa household income ng isang pamilya kung masasaklaw ba o hindi ng nasabing programa ang isang mag-aaral.

Bagama’t mananatiling prayoridad ang mga mag-aaral na nasa ilalim ng student financial assistance program, sinabi ni De Vera na tutukuyin naman sa kanilang simplified bracketing ang iba pang posibleng benepisyaryo ng programa.

By: Jaymark Dagala

Under control ng militar ang sitwasyon sa Marawi City sa kabila nang patuloy na bakbakan ng mga awtoridad at Maute Group.

Ayon kay Lt. General Carlito Galvez, Jr. hepe ng WESMINCOM o Western Mindanao Command nagko-consolidate na ang mga tropa ng mga sundalo para mapanatiling tahimik ang Marawi City.

Tiniyak ni Galvez na kaagad nilang tatapusin ang pursuit operations sa iba pang lugar.

Sinabi ni Galvez na bini-verify pa nila ang mga report na nasa Marawi City rin ang ilang dayuhang terorista sa gitna na rin ng inilabas na litrato ng ISIS flag sa nasabing area.

Normal na aniyang ginagawa ng Maute Group ang magladlad ng ISIS flag para makakuha ng suporta mula sa ISIS community sa Iraq at Syria.

Siniguro rin ni Galvez sa publiko ang pagkastigo sa Maute Group dahil natatakot na rin aniya sa kanilang mga buhay ang mga residente ng Marawi City.

By Judith Larino

Isinusulong ni Senate Committee on Education Chairman Francis Escudero ang Synchronized Academic Calendar sa mga paaralan sa buong bansa simula sa school year 2018-2019.

Sa ilalim ng Senate Bill 1432 ni Escudero, gagawing synchronize o sabay-sabay ang pagbubukas ng klase sa lahat ng eskwelahan sa bansa, mapa-pribado man o  pampubliko.

Nakasaad sa panukala na dapat magsimula ang klase sa ikalawang Lunes ng buwan ng Agosto o kaya ay sa ikalawang Lunes ng Setyembre.

Giit ni Escudero, mahalagang magpatupad ng matinding initiative sa sistema ng edukasyon para magawang makipag-kompetensya ng Pilipinas sa iba’t ibang bansa.

By: Meann Tanbio / Cely Bueno

May bago nang Associate Justice ang Sandiganbayan.

Itinalaga ni Pangulong Rodrigo Duterte si Judge Edgardo Caldona ng Makati City Regional Trial Court Branch 65 sa nabanggit na posisyon.

Pinalitan ni Caldona si Sandiganbayan Associate Justice Jose Hernandez na nagretiro noong November 16, 2016.

Si Caldona ay nagtapos sa Ateneo de Manila University at nagtrabaho sa Sandiganbayan sa ilalim ni Justice Sabino De Leon na naging Supreme Court Justice.

By Meann Tanbio

Ibinabala ni Bayan Muna Representative Carlos Isagani Zarate ang taas singil sa kuryente dahil sa Tax Reform Bill ng Duterte administration.

Ayon kay Zarate, tiyak na magmamahal ang kuryente kapag itataas ang excise tax sa produktong petrolyo partikular sa diesel at bunker fuel na ginagamit sa produksyon ng kuryente.

Sa pagtaya ng kongresista, Piso at Limampung Sentimos ang itataas sa singil sa bawat kilowatt hour ng kuryente sa oras na matuloy ang implementasyon ng tax reform bill.

Sinabi ni Zarate na posibleng ang Mindanao ang tatamaan nito dahil Dalawampung porsyento sa nasabing rehiyon ay nakadepende sa oil fired power plants.

By: Meann Tanbio

Tiniyak ni Senate Committee on Public Services Chairperson Grace Poe na magpapatawag siya ng hearing bago mag-adjourn sine die ang sesyon ng kongreso sa susunod na linggo.

Ayon kay Poe, ito ay para mabusisi at madetermina kung may pagmamalabis ba ang mga kinauukulang ahensya ng gobyerno na gumagawa ng IRR o Implementing Rules and Regulations sa Anti-Distracted Driving Act.

Dagdag pa ni Poe, mahalagang may public consultation sa paggawa ng IRR.

By: Meann Tanbio / Cely Bueno

Tuluyan nang sinuspinde ng Department of Transportation ang implementasyon ng ADDA o Anti-Distracted Driving Act.

Ito’y matapos kwestyunin ng House Committee on Transportation ang pagpapatupad sa ADDA nang hindi dumadaan sa anim na buwang information campaign alinsunod sa itinatadhana ng Republic Act Number 10913.

Pansamantala, tututukan muna ng DOTR ang pagpapakalat ng impormasyon sa ADDA.

Sa ilalim ng Section 7 ng anti-Distracted Driving Act, ang DOTR at ang Land Transportation Office, katulong ang Philippine Information Agency,  Department of Education,  Department of Interior and Local Government, Philippine National Police, mga private agencies at  organizations ay dapat na magsagawa ng nationwide information, education at communication campaign sa loob ng anim na buwan mula nang maging epektibo ang batas.

Una rito, nanawagan ang mga Senador sa DOTR na pansamantalang ipahinto ang ADDA dahil sa nakalilitong implementing rules and regulation na ginawa para dito.

By: Meann Tanbio