Nais ng Pangulong Rodrigo Duterte na magpatupad ng curfew sa anim (6) na lalawigan sa Mindanao para maprotektahan ang mga sibilyan sa gitna ng pagpapatupad ng Batas Militar doon.
Ayon sa Pangulo, kabilang dito ang Lanao del Sur, Lanao del Norte, Maguindanao, Sultan Kudarat, North Cotabato at Zamboanga.
Kapag mayroong curfew, malilimitahan na ang galaw ng mga mamamayan kapag dis oras ng gabi at karaniwang saklaw nito ang mga kabataan at menor de edad.
By Katrina Valle | with report from Aileen Taliping (Patrol 23)
Nasa kamay ng Kongreso kung puputulin ng mas maaga o palalawigin pa ang Martial Law sakaling tapos na ang animnapung (60) araw na bisa nito.
Ayon kay House Speaker Pantaleon Alvarez, isa lamang ito sa napakaraming safeguards ng 1987 Constitution upang hindi maabuso ang deklarasyon ng Martial Law.
Sinabi ni Alvarez na maaari nilang paagahin ang pagtatapos ng Martial Law kung wala na ang panganib ng terorismo sa Mindanao subalit puwede rin nila itong palawigin ng mahigit sa animnapung (60) araw kung kakailanganin.
Kasabay nito, idinepensa ni Alvarez ang Martial Law sa buong Mindanao sa halip na sa Marawi City lamang kung saan nanggugulo ang Maute Group.
Layon lamang anya nito na mapigilang tumawid pa sa ibang lugar ang kaguluhan.
By Len Aguirre
Sugatan ang labing isang (11) sundalo makaraang makabakbakan ang tropa ng Abu Sayyaf Group (ASG) sa Patikul Sulu kaninang umaga.
Ang mga sugatang sundalo ay pawang mga kasapi ng 10th Infantry Battalion na nakabase sa Patikul.
Ayon kay Joint Task Force Sulu Commander Brig. General Cirilito Sobejana, isa sa mga nasugatang sundalo ang nasa kritikal na kondisyon at inaasahang ililipad patungong Zamboanga City anumang oras ngayong araw.
Sinasabing kagagaling lamang ng mga sundalo sa kanilang detachment sakay ng military truck nang bigla silang tambangan ng Abu Sayyaf.
By Ralph Obina
Plano ni hall of famer coach Freddie Roach na magpatupad ng pagbabago sa training ni 8-division world champion Manny Pacquiao.
Ayon kay Roach, kung posible ay nais niyang paagahin ang biyahe ng team Pacquiao patungong Australia upang doon isagawa ang mas matinding training ng Pambansang Kamao.
Kalimitan kasing dalawang linggo bago ang laban ang lipad ng Team Pacquiao sa bansang pagdarausan ng bakbakan.
Samantala, nangangarap pa rin si Roach na bumalik ang gana ni Pacquiao at pabagsakin nito sa laban ang Australian boxer na si Jeff Horn.
Aminado naman si Roach na imposible itong mangyari.
Matatandaang 2009 pa ng huling makapagpahalik ng lona si Pacquiao nang i-knocked out nito si Puerto Rican boxer Miguel Cotto.
By Ralph Obina
Mistulan nang ghost town ngayon ang Marawi City matapos itong pasukin ng Maute Group.
Ayon kay Marawi City Mayor Majul Gandamra, nananatiling sarado ang mga business establishments at halos lahat ng tanggapan pampribado man o sa gobyerno.
Ang mga residente anya ng syudad na hindi pa lumilikas ay hindi rin lumalabas ng kanilang mga tahanan dahil sa takot na maabutan ng bakbakan sa pagitan ng militar at ng Maute Group.
Sinabi ni Gandamra na maging siya ay hindi na umaalis ng City Hall dahil sa pangamba na kubkubin ito ng mga bandido.
“Merong threat dahil natatakot ang maraming tao, hindi sila makapag-open ng kanilang establishment, ang mga opisina pansamantala pinatigil natin, we do not know kung anong naiisip nila, puwede nilang gamiting human shield ang mga tao at ayaw nating mangyari yun.” Ani Gandamra
Ayon kay Gandamra, mahirap matiyempuhan ang Maute Group dahil nakakalat sila sa iba’t ibang panig ng syudad.
Pangunahing modus anya ng mga bandido ang magpakuha ng larawan sa iba’t ibang parte ng marawi para i-post sa social media upang ipakita na kontrolado nila ang syudad.
“Puwedeng sumiklab ang gulo anytime, hindi natin kontrolado ang iniisip ng isang grupo, regardless of the video kung gaano sila karami still they can instill fear sa mga tao.” Pahayag ni Gandamra
Relief operations
Samantala, makikipagsanib-pwersa na ang Philippine Coast Guard o PCG sa Department of Social Welfare and Development o DSWD para magdala ng relief goods sa mga apektadong residente na naiipit sa labanan sa pagitan ng pwersa ng gobyerno at Maute Group sa Marawi City.
Ayon kay PCG Spokesman Commander Armand Balilo, isasakay sa BRP Batangas ang tatlong (3) trak ng relief goods ng DSWD na kinabibilangan ng bigas, de lata, kape, kumot at banig.
Maliban dito, kasama rin ng PCG ang kanilang medical team na gagawing floating hospital ang naturang barko pagdating ng Iligan Port.
By Len Aguirre / Ralph Obina
Hawak na ng British Police ang ika-pitong suspek sa pambobomba sa concert ng American pop singer na si Ariana Grande sa Manchester City.
Naaresto ang hindi pa pinapangalanang suspek sa kalagitnaan ng paghahalughog ng mga pulis sa isang bahay sa Nuneaton, Warwickshire.
Inaalam na ng mga awtoridad kung may kaugnayan ang pito (7) sa sinasabing suicide bomber na si Salman Abedi.
Dalawampu’t dalawa (22) ang nasawi sa nasabing pambobomba kabilang si Abedi matapos ang performance ng US pop singer na si Ariana Grande sa Manchester Arena, noong Martes.
Samantala, napag-alaman ng mga pulis na dati umanong miyembro ng Al-Qaeda sa Libya ang ama ni Abedi na kasalukuyang nakapiit sa Tripoli.
By Drew Nacino
Suportado ni dating Philippine Constitutional Association o PHILCONSA President, Atty. Bonifacio Alentajan ang idineklarang Martial Law ni Pangulong Rodrigo Duterte sa Mindanao.
Ayon kay Alentajan, hindi na dapat kuwestyunin ang pagdedeklara ng batas militar dahil malinaw namang may kaguluhan sa Marawi City, Lanao del Sur kung saan may ilang sibilyan na ang pinatay ng Maute Group.
“Halos araw-araw may namamatay, linggo-linggo may kaguluhan, dapat na talagang magkaroon ng Martial Law sa Mindanao, marami kasi diyan walang ginagawa ang mga tao diyan sa Mindanao, tingnan mo yung mga sumuko at nahuling miyembro ng Abu Sayyaf at Maute puro bata, ibig sabihin hindi nag-aaral yang mga yan, walang ginagawa.” Ani Alentajan
Sinupalpal naman ni Atty. Alentajan ang mga bumabatikos at kumokontra sa idineklarang Martial Law partikular si Senador Antonio Trillanes.
“Itong mga tumututol at nagra-rally pa ay sila kaya ang ipadala natin sa Marawi para matigil ang kaguluhan doon, isang senador din diyan tutol din, siya kaya ang pumunta doon, dati siyang sundalo, ipadala mo siya doon, tignan natin kung anong magagawa niya diyan, sang-ayon yan sa ating Saligang Batas.” Pahayag ni Alentajan
By Drew Nacino | Balitang Todong Lakas (Interview)
