June 2026

Pinag-aaralan na ng AFP o Armed Forces of the Philippines na putulin ang linya ng komunikasyon sa Marawi City kung saan nagaganap ngayon ang bakbakan sa pagitan ng militar at Maute group.

Ayon kay AFP Public Affairs Office Chief Col. Edgard Arevalo, ito’y upang matiyak ang seguridad ng mga sibilyan at militar sa lugar dahil maaaring gamitin ng mga terorista  ang cellphone bilang pang-detonate ng kanilang mga pampasabog.

Maliban dito, ginagamit din umano ng mga terorista sa Marawi ang cellphone para makahingi ng tulong at suporta sa iba pa nilang kasamahan

Dagdag pa ni Arevalo, makatutulong din ang pagputol ng linya ng komunikasyon sa Marawi para mabawasan ang mga litrato o video na ipino-post sa social media na maaaring maglagay sa alangin sa operasyon ng militar.

Maute group tinangkang sunugin ang buong siyudad ng Marawi

Inihayag ni AFP Chief of Staff General Eduardo Año na tinangka ng Maute group na sunugin ang buong siyudad ng Marawi.

Ayon kay Año, batay sa nakukuha nilang impormasyon mula sa kanilang mga source, itataon sana ng mga terorista ang panununog sa Marawi sa panahon ng Ramadan.

Ngunit napigilan anya ito dahil sa ikinasa nilang pagsalakay noong nakaraang linggo sa isang safe house ng mga terorista sa Brgy. Basak Malutlut kung saan nanunuluyan ang kanilang target na si abu Sayyaf Leader Isnilon Hapilon na tinaguriang Amir ng ISIS sa Pilipinas.

Ibig sabihin, bago pa man ang ikinasang raid sa Marawi ng mga otoridad ay na-plano na ng Maute ang panggugulo doon.

Ito aniya ang dahilan kung bakit nakabwelta agad ang mga kalaban at nanggulo sa ilang panig ng marawi noong salakayin ng mga pulis at sundalo ang kuta ng mga terorista.

By Meann Tanbio | With Report from Jonathan Andal

Naniniwala si Justice Secretary Vitaliano Aguirre na sa oras na sang-ayunan na ng kongreso ang proklamasyon ng batas militar sa Mindanao, malabo na itong baligtarin o kontrahin pa ng Korte Suprema.

Sinabi ni Aguirre na bagamat sa ilalim ng Section 18, Article 7 ng 1987 Constitution, may kapangyarihan ang Korte Suprema na tukuyin kung may factual basis ang proklamasyon ng batas militar kung kaya’t ang tanging pagkakataon lamang para kontrahin ng hudikatura ang proklamasyon ay kung magpapasya ito na “arbitrary” o walang basehan ang ginawang deklarasyon ni Pangulong Rodrigo Duterte.

Gayunman, ang mga pangyayari na pinagbasehan ng martial law ay malinaw naman aniyang idinetalye ng Pangulo sa kanyang isinumiteng liham sa dalawang kapulungan ng kongreso.

Naniniwala rin si Aguirre na kung  kokontrahin ng kongreso ang idineklarang martial law ng Pangulo ay hindi rin ito maaaring baligtarin maski ng judiciary at kung ito naman ay sasang-ayunan ng lehislatura ay hindi rin pwedeng baligtarin maging ng Korte Suprema.

Iginiit pa ni Aguirre na sa kanyang opinyon, dapat magtipon sa isang joint session ang Kamara at Senado para pagtibayin ang batas militar, dahil kung hindi ito mangyayari ay maiiwan sa Korte Suprema ang pagpapasya kaugnay ng legalidad ng deklarasyon ng batas militar sa Mindanao.

Aguirre ibinunyag na may kumubra ng P10-M reward money kasunod ng pagsuko ni Napoles

Ibinunyag ni Justice Secretary Vitaliano Aguirre na mayroong kumubra ng sampung (10) milyong pisong reward money mula sa isang mataas na opisyal ng Malakanyang ng nakaraang administrasyon, kasunod ng pagsuko ni Pork Barrel Scam Queen Janet Lim Napoles.

Gayunman, sinabi ni Aguirre na mas mainam na ang kampo na lamang ni Napoles ang magbunyag kung sino ang nasabing opisyal.

Matatandaang noong August 28, 2013, ang noon ay wanted na si Napoles ay sumuko kay dating Pangulong Noynoy Aquino, ilang oras matapos ianunsyo ng pamahalaan ang sampung (10) milyong pisong pabuya na ipagkakaloob sa makapagtuturo ng impormasyon para sa ikadarakip ni Napoles.

Si Napoles ay tinutugis noon sa bisa ng arrest warrant na inisyu ng Makati Regional Trial Court (RTC) para sa kasong serious illegal detention.

By Meann Tanbio | With Report from Bert Mozo

Hindi sapat ang pagpapatawag ng ‘committee of the whole’ para talakayin ang idineklarang martial law ng Pangulong Rodrigo Duterte.

Sinabi ni Congressman Tom Villarin na kailangang magkaroon ng joint session ang dalawang (2) kapulungan ng kongreso para talakayin at pagbotohan ang deklarasyon.

Kailangan aniyang malaman ng publiko ang mga ginamit na basehan ng Pangulong Duterte para magdeklara nito.

Pangulong Duterte posibleng lumabag sa saligang batas

Maaring magkaroon ng paglabag sa saligang batas si Pangulong Rodrigo Duterte kung babalewalain nito ang kongreso at Korte Suprema hinggil sa legalidad ng martial law sa Mindanao.

Sinabi ito ni Congressman Teddy Baguilat kasunod ng mga pahayag na tanging ang mga militar at pulis lamang ang dapat pakinggan hinggil sa usapin ng pagpapalawig sa idineklarang martial law.

Muli rin iginiit ni Baguilat ang pagkakaroon ng joint session ng kongreso at ang pagrereview ng Korte Suprema sa idineklarang martial law.

By Katrina Valle | With Report from Jill Resontoc