June 2026

Hindi pa sumusuko ang mababang kapulungan ng Kongreso sa Income Tax Cut Bill, dahil umaasa pa rin silang mapa-oo si Pangulong Benigno Aquino III.

Ayon kay Marikina Rep. Miro Quimbo, Chairman ng House Ways and Means Committee, may panahon pa para makumbinsi si Aquino na payagan na ang pagpapatibay sa nasabing panukalang batas.

Ito ay upang lumaki ang take-home pay ng mga manggagawa, hindi lamang sa gobyerno kundi sa pribadong sektor.

Noong Lunes ay nakipagpulong sina House Speaker Feliciano Belmonte Jr., at Senate President Franklin Drilon sa Pangulo kung saan hindi nito isinara nang tuluyan ang kanyang pintuan sa nasabing panukala.

Tanging si Finance Secretary Cesar Purisima ang kontra sa nasabing panukala.

Sinabi ni Quimbo na hindi ang kalihim ang magdedesisyon sa bagay na ito kundi si Aquino lamang.

By  Mariboy Ysibido  

Kumpirmadong magiging seatmate ni Pangulong Benigno Aquino III si Chinese President Xi Jinping sa darating na Asia Pacific Economic Cooperation (APEC) Summit sa susunod na linggo kasunod nang mainit na usapin sa pinag-aagawang teritoryo ng West Philippine Sea.

Kinumpirma ito ni National Organizing Committee Director General, Marciano Paynor at ipinaliwanag na ito’y kasama sa isinasagawa ng APEC kung saan ang dati, kasalukuyan at ang susunod na bansa na magho-host ay magkakatabi sa mga gaganaping pagpupulong.

Ani Paynor, isang pagkakataon ito para kay Pangulong Aquino at President Xi sa isang bilateral kung naisin man nila.

Nabatid na ang China ang nakaraang host ng APEC summit noong nakaraang taon habang ang Peru naman ang nakalinyang magiging country host sa susunod na taon.

By  Mariboy Ysibido 

Asahan na ang tapyas presyo sa tinapay at maging sa instant noodles sa mga susunod na araw.

Ito ayon kay Department of Trade and Industry (DTI) Undersecretary Victorio Dimagiba ay kasunod din nang pagbaba ng presyo ng trigo sa World Market.

Sinabi ni Dimagiba na ang presyo ng tinapay ay posibleng bumaba ng P0.50 hanggang P1 kada loaf.

Ang Pinoy tasty ay kasalukuyang mabibili sa P36 pesos kada loaf samantalang ang Pinoy pandesal ay mabibili sa P22 kada pack.

Bukod dito, ipinabatid ni Dimagiba na hiniling nila sa community bakeries na dagdagan ng isa ang kada sampung pirasong pack ng pandesal sa parehong presyo.

Mahigpit aniyang minomonitor ng DTI ang pagbaba ng presyo ng trigo simula noong buwan pa ng Hulyo para maisulong ang kinauukulang tapyas presyo rin sa mga produktong ginagamitan nito partikular ang tinapay.

By  Judith Larino

Pinayuhan ng Liberal Party (LP) sa pamamagitan ng kanilang spokesman na si Marikina Rep. Miro Quimbo si Presidential candidate Senador Grace Poe na huwag mapikon sa citizenship isyu.

Ginawa ni Quimbo ang pahayag matapos mairita ni Poe sa mga tanong ng mga mamamahayag sa Pangasinan ukol sa kanyang kinakaharap na kaso na kumukuwestiyon sa kanyang citizenship.

Ayon sa mambabatas, lehitimo ang mga tanong kay Poe na dapat nitong sagutin nang maayos at huwag maging iritable kapag tinatanong ito sa kanya sa kanyang pag-iikot sa bansa.

Si Poe ay nahaharap sa tatlong disqualification case sa Commission on Elections (COMELEC) na pawang isinampa pagkatapos maghain nito ng kanyang certificate of candidacy (COC) noong Oktubre 15, 2015.

Bukod pa ito sa kasong nakasampa kay Poe sa Senate Electoral Tribunal (SET) na kumukuwestiyon hindi lamang sa kanyang pagiging Filipino kundi maging sa kanyang residency status.

By Mariboy Ysibido 

Pina-subpoena ng senado ang kopya ng CCTV hinggil sa ginawang pag-aresto sa isang Amerikano na biktima ng laglag bala modus sa Ninoy Aquino International Airport (NAIA).

Inatasan ni Blue Ribbon Committee Chairman TG Guingona III ang Manila International Airport Authority o MIAA at Office of Transportation Security na bigyan sila ng kopya ng naturang CCTV footage.

Sa isinagawang pagdinig kahapon, inusisa ni Guingona si OTS Administrator Roland Recomono patungkol sa CCTV video na hindi pa rin maibigay sa National Bureau of Investigation o NBI.

By  Meann Tanbio