June 2026

Laglag sa kamay ng mga otoridad ang 6th most wanted person sa Metro Manila sa buy-bust operation sa Caloocan City.

Narekober sa suspek na kinilalang si Gregorio Catalan ang 5 gramo ng hinihinalang shabu na nagkakahalaga ng tinatayang P10,000 piso.

Naaresto si Catalan matapos ang ilang linggong surveillance dito ng Regional Anti Illegal Drugs ng NCRPO.

Nakatakda namang sumalang sa inquest proceeding si Catalan sa susunod na Lunes.

By  Ralph Obina  

Bagama’t hindi nagkulang ng paalala ang Commission on Elections (COMELEC) sa mga botante na magparehistro, marami pa ring botante sa mga lalawigan ng Albay at Laguna ang bigo pa ring makapagpatala.

Ayon sa COMELEC Albay, 6,000 lamang ang nagpa-biometrics nitong nakalipas na Sabado mula sa 47,000 na hindi nag-update ng kanilang rehistro.

Sa kabila ng maghapong paghihintay sa mga COMELEC offices, marami pa rin ang bigong makapagparehistro dahil sa hanggang 300 lamang ang kaya ng sistema.

Samantala, ayon naman sa COMELEC Laguna, tinataya namang nasa 35,000 mula sa 1.6 na milyong botante ang hindi rehistrado sa lalawigan ng Laguna habang 20,000 sa mga ito ang hindi kumpleto ang kanilang biometrics.

By Jaymark Dagala 

Binanatan ng grupo ng mga biktima ng super bagyong Yolanda si Social Welfare and Development Secretary Dinky Soliman.

Ito’y dahil sa kabiguan ng administrasyon na bigyan ng permanenteng tahanan ang mga sinalanta ng kalamidad dalawang taon na ang nakalilipas.

Ayon kay Marissa Cabaljao, Secretary General ng grupo, isang malaking sinungaling si Soliman dahil sa nagtatiyaga pa rin sa mga masisikip at marurupok na bunk houses ang may 400 pamilyang sinalanta ng bagyo.

Enero ng nakalipas na taon pa aniya ipinangako ni Soliman na matatapos ang mga permanenteng tahanan sa loob ng anim na buwan, ngunit dalawang taon na anila ang nakalilipas, hindi pa rin nila nakikita ang mga ipinangakong bahay.

By Jaymark Dagala  

Bagama’t hindi deklaradong holiday, may ilan pa ring piniling tumungo sa mga sementeryo o himlayan ngayong araw, All Souls Day.

Kahit tapos na ang Undas, marami pa ring mga nagtitinda ng bulaklak at kandila sa paligid ng mga sementeryo para sa mga hahabol.

Ngunit, kapansin-pansin na bagsak presyo nang ibinebenta ang mga bulaklak tulad ng dalawang dosenang rosas na mabibili sa halagang P100 piso na dati’y P200 piso.

Subalit gaya ng inaasahan, tumambad sa mga bumibisita ang santambak na basurang iniwan ng mga nauna nang nagpunta sa mga sementeryo kahapon, araw ng tradisyunal na Undas.

By Jaymark Dagala 

Nakalinya na ang mga panukala at resolusyong tatalakayin sa pagbubukas ng regular session ng senado.

Kabilang dito ang mosyon ni Senate Minority Leader Juan Ponce Enrile na buksan ang imbestigasyon sa Mamasapano operations na ikinasawi ng 44 na miyembro ng PNP Special Action Force.

Maliban sa Mamasapano, inaasahang bibilisan rin ng senado ang deliberasyon sa panukalang national budget para sa 2016 at ang panukalang Bangsamoro Basic Law (BBL).

By  Len Aguirre

Isang Indian Navy ship ang nasa Maynila para sa 4-day goodwill visit na layong patatagin ang defense ties ng Pilipinas at India.

Dakong alas-9:00 ng umaga kahapon nang dumating sa Pier 15 ng South Harbor ang Shivalik-Class Stealth at Multi-Role Frigate na INS Shivalik.

Bago dumaong, sinalubong ang naturang barko ng isang Philippine Navy vessel sa bahagi ng Corregidor Island.

Ayon kay Philippine Navy Public Affairs Chief, Commander Lued Lincuna, makikibahagi ang mga crew member ng Indian vessel sa pangunguna ni Capt. Kunal Singh Rajkumar sa kanilang mga counterpart.

Nakatakda ring mag-courtesy call si Kunal at iba pang Indian key officer kay Philippine Navy Chief, Vice Adm. Caesar Taccad, bukas.

By  Drew Nacino | Jonathan Andal