2 kilabot na robbery kidnap personality ang patay matapos maka-engkuwentro ng Pulisya sa Calamba City sa Laguna.
Sa impormasyon mula sa Laguna Provincial Police Office, nangyari ang insidente sa Silangan exit ng South Luzon Expressway sa bahagi ng nabanggit na lungsod dakong alas 2:30 ng hapon.
Bunga ito ng ginawang pagmamanman ng mga tauhan ng Regional Intellegence Division – Anti Carnapping Unit ng CALABARZON PNP.
Nabatid na isang Chinese National umano ang dinukot sa bahagi ng ASEANA sa Parañaque City na isinakay sa kulay puting van at dadalhin umano sa isang bahay sa Laguna.
Sinundan ito ng mga Pulis hanggang sa mapansin na sila ng mga suspek pagsapit sa Cabuyao exit kaya’t doon na nagsimula ang habulan hanggang sa mauwi na sa engkuwentro .
Nakuha sa pinangyarihan ng engkuwentro ang iba’t ibang kagamitan, bultu-bultong pera, 2 calibre 45 baril at ID ng mga suspek kung saan, 1 rito ay may tsapa ng PNP.