Iginiit ng Misis ni Jaime Aquino, dating Manila Times reporter at National Press Club (NPC) member na “planted” o planado ang nakitang granada ng mga tauhan ng National Bureau of Investigation sa bahay ng kanilang Tiyahin.
Matatandaang nagpapagasolina si Aquino kasama ang kaniyang misis na si Manilyn Mendoza sa Pangasinan nang biglang lapitan ng mga tauhan ng nbi sa bisa narin ng isang Bench warrant.
Nabatid na sa halip na dalhin sa presinto ng mga tauhan ng NBI si Aquino ay dinala ito sa kanilang bahay partikular na sa kanyang Water Refiling Station at sa isang Pavillon para isagawa ang bisa ng Search warrant na inilabas ni Pangasinan Tayug RTC Branch 51 sa ilalim ni Judge Rusty M. na may petsang March 14, 2022.
Maging ang puwesto ng spare parts ng sasakyan, tindahan at ang isang bahay na hindi naman nila pag-aari ay hinalughog din ng mga imbestigador kung saan, walang nakitang kahina-hinala ang mga ito.
Dito na nagtataka sina Mendoza at Aquino dahil makalipas ang ilang minuto ay nakakuha na ang NBI ng dalawang granada sa mismong lagayan ng mga pinggan sa isang bahay na pag-aari ng kanilang Tiyahin.
Ayon sa mag-asawa, imposibleng maglagay sila ng granada sa mismong lagayan ng pinggan dahil doon naglalaro ang kanilang mga anak kasama ang iba pang bata.
Nilinaw ni Manilyn na ang Bench warrant ng kaniyang asawa na iprinisinta at dahilan ng pagdakip nito ay may kaugnayan sa kanyang kasong libel noong 2007 kaya’t nakapagtataka ang ikinasang Search warrant ng NBI dahil wala naman itong kaugnayan sa kasong una na nang kinasangkutan ni Jaime.
Sa ngayon, patuloy pa ang imbestigasyon sa pagitan ng NBI at ni Jaime Aquino. —sa panulat ni Angelica Doctolero