Dalawa pang bilangguan sa Cebu ang napasok na rin ng impeksyon ng coronavirus disease 2019 (COVID-19).
Ayon kay Cebu Governor Gwen Garcia, 18 bilanggo sa Cebu Provincial Detention and Rehabilitation Center ang nagpositibo sa COVID-19.
May isa na rin anyang inmate ang nasawi sa naturang bilangguan dahil sa COVID-19.
Sinabi ni Garcia na posibleng ang isang administrative staff ng bilangguan na tumangging mag-stay in sa pasilidad at patuloy na umuuwi araw araw ang pinagmulan ng kumalat na impeksyon.
Samantala, isang jail officer naman ang nagpositibo sa COVID-19 sa Lapu Lapu City Jail.
Una nang nakapagtala ng mahigit sa 200 COVID-19 positive ang Cebu City Jail samantalang isa naman sa Mandaue City Jail.
