Umabot na sa 12,000 Pilipino ang naharang ng mga kawani ng Bureau of Immigration (BI) sa gitna ng kanilang kampanya kontra illegal recruitment at human trafficking.
Sa datos, lumalabas na 11,706 na mga pasahero ang naharang sa iba’t-ibang pantalan, habang 9,411 naman ang napigilang makalabas ng bansa sa Ninoy Aquino International Airport (NAIA).
Paliwanag ni BI Commissioner Jaime Morente, ang naturang bilang ng mga Pilipinong naharang ng mga kawani ng ahensya ay mas mababa ng 70% kumpara sa naitalang 38,522 na mga biyahero noong 2019.
Dagdag pa ni Morente, kumaunti rin ang bilang dahil sa epekto ng coronavirus disease 2019 (COVID-19) pandemic matapos na magpatupad ng travel restrictions.
Kasunod nito, nagpaalala si Morente sa mga nagnanais na magtrabaho sa ibayong dagat na mag-ingat sa mga illegal recruiters.
