Itinuturing na “malisyoso” at “black propaganda” ng kampo ni Vice President Sara Duterte ang impormasyong ipinaratang ni dating Senador Antonio Trillanes laban sa Pangalawang Pangulo.
Ito’y matapos isapubliko ni Trillanes ang mga nakalap nitong impormasyon; lalo na tungkol sa koneksyon ni VP Sara sa drug lord na si Sammy Uy, at sa umano’y pagtanggap ng pondo ng Bise Presidente at asawa nitong si Atty. Mans Carpio mula sa mga negosyante mula China.
Ayon sa tagapagsalita ng Pangalawang Pangulo na si Atty. Paolo Panelo Jr., dahil tumangging humarap sa Senate Impeachment Court si Trillanes upang isiwalat ang mga nakalap nitong ebidensya, naniniwala ang kampo ni VP Sara na hindi ito maituturing na matibay.
Dagdag pa ni Panelo, tiyak na masasampahan ng reklamo si Trillanes mula sa Bise Presidente dahil sa mga inilabas nitong paratang. | Sa panulat ni Anjo Riñon
