Ipinaliwanag ni dating Bangko Sentral ng Pilipinas (BSP) Deputy Governor Diwa Guinigundo ang mga dahilan kung bakit patuloy na humihina ang piso laban sa dolyar, kabilang ang pagiging import-dependent ng ekonomiya ng bansa.
Ayon kay Guinigundo, kapag tumataas ang presyo ng langis at iba pang imported goods, tumataas din ang pangangailangan ng Pilipinas sa dolyar. Dagdag pa rito ang pagtaas ng interest rates sa Estados Unidos na nagiging dahilan upang maging mas kaakit-akit ang dollar-denominated assets para sa ilang investors.
Nakadagdag din sa pressure sa piso ang mga pandaigdigang tensyon, kabilang ang problema sa Strait of Hormuz at mga pag-atake ng Estados Unidos sa Iran. Maaari rin mapabilis ang paghina ng piso dahil sa market positioning, hedging ng mga korporasyon at paglipat ng ilang investors mula peso assets patungo sa dollar assets.
Ani Guinigundo, maaaring makinabang sa unang tingin ang mga pamilyang tumatanggap ng remittances mula sa mga Overseas Filipino Worker (OFW) dahil mas maraming piso ang katumbas ng parehong halaga ng dolyar. Ngunit maaari rin itong mabawasan ng epekto ng pagtaas ng presyo ng mga bilihin.
Maging ang pamahalaan ay maaaring maapektuhan dahil mas maraming piso ang kailangan para mabayaran ang parehong halaga ng dollar-denominated debt. Dahil dito, maaaring lumiit ang tinatawag na fiscal space o kakayahan ng gobyerno na gumastos para sa imprastraktura at mga serbisyong panlipunan tulad ng pampublikong paaralan at kalusugan.
