Pag-uusapan muna nina Vice President Sara Duterte at Defense Counsel Attorney Michael Poa ang posibilidad na magtalaga ng bagong spokesperson para sa defense team sa impeachment trial.
Alinsunod ito sa utos ni Presiding Officer Senador Chiz Escudero na magtalaga ng spokesperson sa House prosecution at defense team, para maiwasang maapektuhan ang kanilang mga tungkulin bilang mga abogado sa kaso.
Sa kasalukuyan, si Atty. Poa ang nagsisilbing tagapagsalita ng depensa bukod pa sa pagiging isa sa mga legal counsel ng bise presidente.
Aminado si Atty. Poa na mahirap pagsabayin ang pagiging abogado at tagapagsalita ng defense team kaya nagpapasalamat din siya sa mungkahi ng presiding officer.
Gayunman, giit ng abogado na may kaakibat na hamon ang pagpapalit ng spokesperson, kabilang ang kakulangan ng bagong tagapagsalita sa pamilyaridad sa media, sa kliyente, at sa mga detalye ng kaso dahil hindi ito bahagi ng legal team.—sa panulat ni Reabelle Medina mula kay Jenn Patrolla (Patrol 38)
