Itinuring ni Defense Secretary Gilberto Teodoro Jr. na isang “quasi-state statement” ang pahayag ng ilang Chinese scholars na ang Batanes ay sinasabing bahagi ng China sa pamamagitan ng Taiwan.
Ayon kay Sec. Teodoro, bagama’t hindi ito opisyal na pahayag mula sa gobyerno ng China, dapat aniya itong seryosohin dahil maaaring nagpapahiwatig ito ng intensyon.
Giit pa ng kalihim, katawa-tawa ang naturang pahayag ngunit hindi ito dapat balewalain, dahil ang mga pahayag ng academe sa bansang China ay maaaring magsilbing mensahe ng estado.
Samantala, binigyang-diin naman ni Philippine Coast Guard Spokesperson for the West Philippine Sea Rear Admiral Jay Tarriela na dapat kondenahin ang naturang pahayag upang hindi ito maging normal o tanggapin ng publiko.
Sa ngayon, wala pang opisyal na pahayag ang Chinese Embassy kaugnay ng isyu. | Sa panulat ni Reabelle Medina
