Mariing kinundena ni House Deputy Speaker Janette Garin ang umano’y pambubully sa mga House prosecutors kasunod ng personal na pag-atake sa social media ng ilang tagasuporta ni Vice President Sara Duterte matapos ang unang linggo ng impeachment trial.
Kasunod ito ng post, memes, at pambabatikos ng mga netizen kay lead prosecutor Gerville Luistro dahil sa “saliva bath” video na nagviral sa social media.
May nakita kasing laway sa bibig ni Luistro habang inilalahad niya ang opening statement ng prosecution at ang tila sunud-sunod na pag-singhot ni private prosecutor Atty. Amando Virgil Ligutan habang naghaharap ng mga ebidensya at testigo.
Ayon kay Garin, bilang isang doctor at dating kalihim ng Kalusugan, normal lang ang pagkakaroon ng laway, panunuyo ng bibig, at sipon na maaaring nagdulot ng dehydration dahil sa matagal na pagsasalita at hindi pag-inom ng tubig at maintenance medicine.
Aniya, indikasyon ito ng viral infection at hindi palatandaan ng pagsisinungaling.
Iginiit ni Garin na hindi dapat inililihis sa ibang diskurso ang isyu ng pananagutan sa impeachment trial ni Vice President Sara Duterte.
Para kay Garin, sa halip na personal na atakihin ang mga prosecutor, dapat umanong pagtuunan ng publiko ang mga ebidensya at mga isyung tinatalakay sa impeachment trial.
Naniniwala ang House leader na ang personal na pag-atake ay para lamang iligaw sa tunay na atensyon sa Senate impeachment court ang publiko.
Ang mahalaga, aniya, rito ay kung tama bang nailalahad ng mga prosecutor at kung nagagampanan ba nang maayos ang kanilang tungkulin.
Malinaw, aniya, na pambubully ang pangungutyang ginawa sa mga prosecutor at iginiit na ginagawa lamang ng mga ito ang kanilang trabaho sa itinakda ng Konstitusyon.
Hinimok rin ni Garin ang publiko na tigilan na ang pagpapakalat ng maling impormasyon at ibalik ang usapin sa tunay na nilalaman at merito ng impeachment case. | via Geli Mendez (Patrol 30)
