Sa pagsisimula ng impeachment trial ni Vice President Sara Duterte bukas, Hulyo 6, lumutang din ang ulat na maaaring sumabay din ang umano’y nakatakdang pag-aresto kaugnay ng kasong plunder laban kay Senador Rodante Marcoleta, dahilan upang maging palaisipan kung makadadalo ito sa trial at kung ano ang magiging epekto nito sa mga susunod na kaganapan sa Senado, ayon kay Dr. Froilan Calilung, isang political analyst.
Matatandaan na matapos ianunsyo ni Ombudsman Jesus Crispin Remulla noong Hunyo 29 na nakatakdang magsampa ang Office of the Ombudsman ng kasong plunder laban kay Senador Rodante Marcoleta kaugnay ng umano’y campaign donations noong 2025 elections, nagsagawa ng biglaang rally ang Iglesia ni Cristo (INC) sa EDSA People Power Monument bilang panawagan para sa transparency, accountability, at katarungan, gayundin sa umano’y isyu ng “selective justice” laban sa senador.
Ayon pa kay Dr. Calilung, may mahalagang bahagi si Sen. Marcoleta sa kasalukuyang impeachment proceedings at sa mga imbestigasyon sa flood control anomalies.Ito rin aniya ang sinasabi ng INC na tila unti-unting “nilalagas” ang hanay ng oposisyon sa ilalim ng kasalukuyang administrasyon, na posibleng magbigay-daan upang mas mapadali ang impeachment proceedings at maapektuhan din ang takbo ng imbestigasyon sa mga isyu kaugnay ng flood control projects.
Bagama’t kasalukuyang tahimik ang hanay ng grupo, hindi pa rin aniya matitiyak kung magkakaroon pa ng mga susunod na pagkilos sa mga darating na araw.
Hiling din ni Dr. Calilung na sana ay iwasan na mauwi sa kaguluhan ang sitwasyon, kasabay ng panawagan para sa katahimikan at maayos na proseso habang isinasagawa ang mga imbestigasyon at pagdinig.
