Napigilan ng pulisya ang umano’y planong pamamaril ng isang Grade 10 student sa isang pampublikong paaralan sa General Mariano Alvarez, Cavite.
Ayon sa Cavite Police Provincial Office, agad nilang inaksyunan ang impormasyon mula sa mga opisyal ng paaralan. Sa pakikipag-ugnayan sa pamilya ng estudyante at mga opisyal ng barangay, nabawi ang isang improvised at hindi lisensyadong baril.
Ang menor de edad na estudyante ay isinailalim sa pangangalaga ng Municipal Social Welfare and Development Office alinsunod sa Juvenile Justice and Welfare Act. Hindi rin isinapubliko ang kanyang pagkakakilanlan dahil siya ay menor de edad.
Patuloy ang imbestigasyon at inihahanda na ang kaukulang kaso ayon sa umiiral na batas.
