Ikinokonsidera ng Pamahalaang Lungsod ng Maynila ang pagpapatalsik o expulsion sa mga estudyante sa pampublikong paaralan na mahuhuling nagdadala ng patalim o iba pang armas, o masasangkot sa bullying at rambulan.
Ito’y kasunod ng sunod-sunod na insidente ng karahasan sa ilang paaralan na kinasasangkutan ng mga kabataan.
Ayon kay Manila City Mayor Isko Moreno, irerekomenda niya ang panukala sa School and Community Safety Task Force ng lungsod bilang bahagi ng mga hakbang para mapalakas ang seguridad at disiplina sa mga eskwelahan.
Nagbabala rin ang alkalde na maaari ring mapatawan ng expulsion ang mga estudyanteng masasangkot sa bullying at rambulan kahit maganap pa ito sa labas ng paaralan.—sa panulat ni Jordan Gutierrez
