Pinasasagot na ng Office of the Ombudsman sina Senate Minority Leader Alan Peter Cayetano, Senador Robin Padilla, at suspended Senate Sergeant-at-Arms Mao Aplasca sa kinakaharap nilang reklamong obstruction of justice kaugnay ng barilan at pagtakas ni Senador Ronald “Bato” Dela Rosa sa Senado noong Mayo a-trese.
Sa kautusang nilagdaan ni Assistant Ombudsman Moreno Generoso, binigyan lamang ang mga respondent ng labinlimang araw mula sa pagtanggap ng kautusan upang magsumite ng kanilang counter-affidavit.
Ayon sa Ombudsman, kung hindi magsusumite ng tugon ang mga respondent sa itinakdang panahon sa kabila ng wastong abiso, idederetso na ang kaso para resolusyunan at wala nang karagdagang pleadings o dokumentong tatanggapin.
Matatandaang inihain ng Tindig Pilipinas sa pangunguna ni Kiko Aquino Dee ang naturang reklamo nitong Hunyo a-tres kaugnay ng “pagtakas” ni Senador Dela Rosa sa Senado dahil sa warrant of arrest ng International Criminal Court.—sa panulat ni Jordan Gutierrez
