Bukás ang Department of Social Welfare and Development (DSWD) na makilahok sa mga legislative discussion hinggil sa panukalang pagbaba ng minimum age of criminal responsibility o edad kung kailan maaaring managot sa kasong kriminal ang isang menor de edad.
Ayon kay Social Welfare Secretary Rex Gatchalian, tulad ni Pangulong Ferdinand Marcos Jr., handa rin ang DSWD na pag-usapan ang isyu lalo na matapos ang mga kamakailang pangyayari.
Aniya, makikinig at aktibong makikilahok ang ahensya sa mga pagdinig ng Kongreso at susundin nito ang anumang magiging resulta ng mga talakayan.
Sinabi rin ng kalihim na makikibahagi sa mga pagdinig ang mga attached agency ng DSWD na Juvenile Justice and Welfare Council at Council for the Welfare of Children upang matiyak na mapapangalagaan ang kapakanan ng mga bata sa anumang magiging desisyon.
Muling nabuksan ang usapin ng pagpapababa sa edad ng pananagutang kriminal matapos ang madugong pamamaril sa isang paaralan sa Tacloban City noong Lunes, kung saan tatlong estudyante ang nasawi habang dalawampu pa ang nasugatan sa insidente. — Sa panulat ni Daniela De Guzman
