Aabot sa hanggang labingisang tauhan ng Ateneo de Manila University ang posibleng irekomenda ng Philippine National Police na kasuhan kaugnay sa pagkamatay nina Rene Baterbonia at Divine Adili.
Ayon kay PNP Chief, Gen. Jose Melencio Nartatez Jr., posibleng kasuhan ng paglabag sa Anti-Hazing Law ang mga indibidwal na mananagot sa pagkamatay ng dalawang atleta kung mapatutunayang may torture na kinalaman sa umano’y team building activity ng Ateneo Blue Eagles noong Hunyo 8.
Gayunman, hindi pinangalanan ni Nartatez kung sinu-sino ang mga indibidwal na kakasuhan.
Sinabi naman ni Interior Secretary Jonvic Remulla na malapit nang matapos ang imbestigasyon ng Department of Interior and Local Government tungkol sa insidente.
Samantala, hinihintay na lamang ng DILG na humarap sa imbestigasyon sina Ateneo President, Fr. Roberto Yap, SJ, at iba pang opisyal ng unibersidad; maging ang negosyanteng si Manny Pangilinan, na isa sa mga financier ng Ateneo Blue Eagles. — Sa panulat ni Anjo Riñon
