Muling inalerto ng Meralco ang mga consumer kaugnay sa nagbabadyang panibagong dagdag-singil sa susunod na buwan sa gitna ng serye ng red alert status sa Luzon simula Mayo 13 hanggang 14.
Bunsod ito ng problema sa mga major transmission line, na naging sanhi ng pagpalya ng ilang power plant.
Dahil dito, kinumpirma ng Independent Electricity Market Operator of the Philippines na sumirit sa 32 pesos per kilowatt hour ang presyo ng kuryente sa Wholesale Electricity Spot Market, na pinagmumulan ng 10 hanggang 15 porsyentong supply ng Meralco at ilang power distributor.
Ayon naman kay Meralco Utility Economics Head Larry Fernandez, dahil sa sobrang taas ng demand bunsod ng matinding init ay nalampasan na nila nitong Mayo 14 ang pinaka-mataas na electricity consumption para sa Luzon noong 2025.
Ang mas mataas aniyang peak demand ay indikasyon na sadyang tataas ang presyo sa spot market na sinabayan pa ng yellow at red alert status kaya’t hindi malayong magkaroon ng panibagong rate increase sa susunod na buwan.
