Ipinag-utos ng Department of the Interior and Local Government ang mahigpit at agarang pagpapatupad ng anti-epal policy sa buong bansa.
Ito ay alinsunod sa DILG Memorandum Circular No. 2026-006 kung saan kasama sa kautusan ang pagtanggal ng pangalan, larawan, at iba pang pagkakakilanlan ng mga opisyal sa lahat ng proyekto, programa, at aktibidad na pinondohan ng pamahalaan.
Saklaw ng direktiba ang lahat ng lokal na pamahalaan mula probinsya hanggang barangay, pati ang mga tanggapan at attached agencies ng DILG.
Ipinagbabawal ang paglalagay ng pangalan, litrato, logo, inisyal, slogan, kulay, o anumang simbolo ng opisyal sa mga project signage at tarpaulin.
Ayon kay Interior and Local Government Secretary Jonvic Remulla, ang mga proyekto ng gobyerno ay pinopondohan ng taumbayan at hindi dapat gamitin sa pansariling promosyon.
Binigyang-diin ng DILG na ang mga programa ng pamahalaan ay hindi personal na billboard ng mga politiko.
Hinikayat din ng DILG ang publiko na ireport ang anumang paglabag sa anti-epal policy.
—ulat mula kay Jenn Patrolla (Patrol 38)
