Nilinaw ni Senate Committee on Finance Chairman Sherwin Gatchalian na posible pa ring magsagawa ng closed-door meeting o executive session sa Bicameral Conference Committee deliberation ng 2026 proposed national budget.
Ito’y kahit pa nagkasundo na ang Senado at Kamara na i-livestream sa kauna-unahang pagkakataon ang proseso bilang bahagi ng transparency.
Ayon kay Senador Gatchalian, kung hihilingin ng mga miyembro ng Bicam na magkaroon ng executive session ay pagbibigyan naman ito basta’t may mabigat na rason lalo kung sensitibo ang isyu tulad ng national security.
Sa kabila nito, mayroon naman din anyang budget transparency portal kung saan i-a-upload ang mga dokumento kaya’t maaaring makita at mabusisi ng publiko ang pambansang budget na pinlantsa ng dalawang kapulungan.
Aminado naman si Gatchalian na magiging teknikal at mahaba ang proseso ng Bicam hearings kaya’t inaasahan ang lahat ng miyembro ng committee, kabilang si Senador Ronald Dela Rosa, na dapat sumipot at depensahan ang budget ng ahensyang kanyang hawak.
