Pinaiimbestigahan ng Makabayan Bloc sa Independent Commission for Infrastructure si Pangulong Ferdinand Marcos Junior at labing isang iba pa.
Ito’y matapos isiwalat ni dating Ako Bicol Partylist Representative Zaldy Co na sangkot si PBBM sa maanomalyang flood control projects.
Kabilang din sa mga inirekomenda ng Makabayan Bloc sina dating Rep. Elizaldy Co; dating DPWH Undersecretary Roberto Bernardo; dating Executive Secretary Lucas Bersamin; dating DBM Secretary Amenah Pangandaman; dating DPWH Secretary Manuel Bonoan; dating PLLO Undersecretary Adrian Bersamin; dating House Speaker Martin Romualdez; Rep. Ferdinand Alexander “Sandro” Marcos; dating DPWH Bulacan 1st District Engineer Henry Alcantara; former Department of Education Undersecretary Trygve Olaivar; at Justice Undersecretary Jose Cadiz Jr.
Ayon kay ACT Teachers Partylist Representative Antonio Tinio, isinummite nila sa komisyon ang written request na may kalakip na mga dokumento upang igiit ang isang independent at transparent na imbestigasyon ng komisyon.
Iginiit pa ng Makabayan Bloc, bilyun-bilyong pisong pera ng taumbayan ang nasasangkot, kaya nararapat lamang na magsagawa ang ICI ng isang independent, transparent, at malalim na imbestigasyon upang mapanagot ang lahat ng sangkot anuman ang posisyon o kapangyarihan ang mayroon sa mga sangkot.
