Idinetalye ni dating Ako Bicol Party-list Zaldy Co ang sistema ng sinasabing pagde-deliver ng pera mula sa insertion kina Pangulong Ferdinand Marcos Jr. at dating House Speaker Martin Romualdez.
Sa panibagong expose video na inilabas ni Co, sinabi niya na nakatanggap siya ng balitang palalabasin ng administrasyon na siya ay isang terorista, kasabay ng pagtanggi sa pahayag ni dating DPWH Engineer Henry Alcantara na nakatanggap siya ng 21 billion pesos mula sa insertion.
Ayon sa dating kongresista, mula 2022 hanggang 2025, aabot sa 56 billion pesos ang halaga ng perang dumaan sa kanya para ibigay kina Pang. Marcos at Rep. Romualdez, bukod pa aniya ito sa sinasabing 100 billion peso insertion ni PBBM sa 2025 budget at 97 billion pesos insertion na umano’y inilagay sa 2026 National Expenditure Program.
Dagdag pa ni Co, kakaupo pa lamang niya bilang chairman ng House Committee on Appropriations, sinabihan na siya ni Rep. Romualdez na kailangan niyang makapag-deliver ng 2 billion pesos kada buwan.
Iginiit din ni Co na dumadaan lamang sa kanya ang mga male-malétang perang sinasabing ipinadadala sa dating House Speaker.
Personal din aniya siyang nag-abot ng pera kay Justice Usec. Jojo Cadiz, na nagsabing iaabot ito kay Pang. Marcos.
