Pumalag si Baguio City Mayor Benjamin Magalong sa naging pahayag ni Palace Press Officer Claire Castro kaugnay sa kanyang pagbibitiw bilang special adviser ng Independent Commission for Infrastructure (ICI).
Ayon kay Mayor Magalong, mistulang pinagdudahan ang kanyang karapatan na mag-imbestiga dahil lamang sa kanyang posisyon bilang adviser.
Lumalabas din anya na parang wala siyang karapatang mag-imbestiga, base sa mensaheng ipinahayag ni Usec. Castro sa isang press conference.
Binigyang-diin ng alkalde na kailangang may gumagalaw sa labas ng imbestigasyon sa mga high-profile, upang makita ang buong larawan ng katiwalian at maaksiyunan ang iba pang mga kaso.
Matatandaang nagbitiw si Mayor Magalong sa nasabing puwesto matapos ianunsyo ng Malacañang na pag-aaralan ng legal team kung ang kanyang pagkakatalaga sa ICI ay akma, dahil na rin sa posibleng conflict of interest bilang alkalde ng Baguio City. —sa panulat ni Daniela De Guzman
