Matatandaang viral sa social media ang matapang na utos ni Pangulong Ferdinand ‘Bongbong’ Marcos Jr. na ipatanggal ang 300-meter floating barrier na inilagay ng China sa entrance ng Bajo de Masinloc o Scarborough Shoal. Ayon nga sa isang eksperto, ang aksyong ito ay nagpadala ng matinding mensahe sa China.
Sa gitna ng patuloy na pangha-harass ng Chinese ships sa mga Pilipinong mandaragat, tiniyak ni House Speaker Martin Romualdez na buo ang suporta ng kamara sa polisiya ni Pangulong Marcos upang depensahan at protektahan ang West Philippine Sea.
Anong mga hakbang ba ang ginagawa ng administrasyong Marcos upang patibayin ang depensa ng bansa, partikular na sa West Philippine Sea?
Tara, suriin natin yan.
Sa ginanap na The Defense Forum na inorganisa ng National Defense College of the Philippines Alumni Association nitong November 10, 2023, kinondena ng keynote speaker na si Romualdez ang panghihimasok ng China sa katubigan ng Pilipinas. Siniguro rin niya ang commitment ng kongreso sa foreign policy ni Pangulong Marcos.
Upang paigtingin ang depensa ng Pilipinas, isinusulong ang modernisasyon ng military assets. Titiyakin din na ang mga tauhan sa defense sector ay may sapat na kasanayan at walang tigil na suporta mula sa bansa.
Bukod dito, ipinagtibay rin ni Romualdez ang suporta ng kongreso upang dagdagan ang budget allocation para sa defense sector. Sa ilalim ng proposed 2024 budget, mayroong ilalaang 282.7 billion pesos para na nasabing sektor. Mas mataas ito ng 21.6% kumpara sa pondo nitong taon.
Ayon sa House Speaker, susuportahan ng pondong ito ang land, air, and naval forces defense programs, United Nations peacekeeping mission, at iba pang programa na magsusulong ng seguridad ng bansa.
Bukod sa kamara, suportado rin ni Timor-Leste President José Ramos-Horta ang posisyon ng administrasyong Marcos sa ginagawang pagdepensa sa mga teritoryo ng bansa sa West Philippine Sea.
Matatandaang nagkaroon ng bilateral meeting ang dalawang lider nitong November 10, 2023 kung saan nagkaroon ng talakayan sa mga karanasan sa international affairs. Ayon kay Pangulong Marcos, sa kabila ng magkaibang hamon na hinaharap ng dalawang bansa, magagamit pa rin ng Pilipinas ang mga karanasan at mungkahi ni President Horta na sundin ang mga polisiya at sistema sa international law para igiit ang karapatan ng bansa West Philippine Sea.
Nais ng pangulo na maayos at mapayapang maresolba ang isyu sa West Philippine Sea. Sa kabila nito, maganda pa rin ang kampanya ng administrasyong Marcos na palakasin ang depensa ng Pilipinas upang matigil ang harassment ng ibang bansa sa kapwa nating mandaragat at maprotektahan ang karapatan natin sa sarili nating teritoryo.
Sabi nga ni Romualdez, “the House of Representatives fully supports the position of President Ferdinand Marcos Jr. that we should continue to assert our sovereignty in the West Philippine Sea and that we should defend every inch of our territory.”
Ikaw, suportado ka rin ba sa kampanya ni Pangulong Marcos na depensahan ang West Philippine Sea?
