Aabot sa P1.3 – M na halaga ng shabu na nakatago sa isang parcel na naglalaman ng massage device, ang nakumpiska ng Philippine Drug Enforcement Agency (PDEA) kahapon.
Ayon sa PDEA, dinala ang parcel sa isang 24-anyos na babae sa Dasmariñas City, Cavite sa isang controlled delivery operation.
Nang tanggapin na ng babae ang package ay saka ito inaresto ng mga tauhan ng PDEA.
Ayon kay PDEA NAIA Supervisor Gerald Javier, ang 200 grams ng shabu sa massage device ay ipinadala mula sa South Africa.
Nadiskubre ito sa Ninoy Aquino International Airport (NAIA) matapos ilagay sa X-ray machine at naamoy ng mga K9 dog.
Pagkatapos nito ay isinumite ng PDEA ang droga sa laboratory test at kinumpirma na naglalaman ito ng ilegal na droga.
Itinanggi naman ng babae na sa kaniya ang kargamento at sinabing pinangalanan lang sa kaniya ang parcel at ito raw ay para sa isang Nigerian National na kanyang naka-date.
Sa ngayon, sinabi ng PDEA na iimbestigahan pa nila ang usapin at makikipag-ugnayan sa Bureau of Immigration (BI) hinggil sa umano’y Nigerian National.
