Naniniwala ang Volunteers Against Crime and Corruption (VACC) na mahirap linisin ng Bureau of Corrections (BuCor) ang kurapsiyon sa New Bilibid Prisons (NBP).
Kasunod ito ng pagkakatalaga ng bagong BuCor Officer in Charge na si Gregorio Catapang Jr. kung saan, magiging mabigat ang mga hamon sa ahensya dahil masyado nang malalim ang naging ugat ng korapsiyon sa Bilibid.
Ayon kay VACC president Boy Evangelista, bukod pa dito, kontrolado ng mga maimpluwensya at mayayamang bilanggo ang ahensya kaya hindi ito madaling malulutas o masosolusyonan ang katiwalian.
Samantala, ikinatuwa naman ng VACC ang isinagawang Oplan Galugad ng ahensya sa NBP kung saan, nakakumpiska ang mga ipinagbabawal na bagay tulad ng iligal na droga, bladed weapons, alak, sigarilyo, mga cellphones at iba pa.
Sa kabila nito, tiniyak ng VACC na kanilang susuportahan ang hangarin ng BuCor sa pangunguna ni Catapang na malinis ang nangungunang problema sa loob ng kulungan.
