Dalawamput isa ang nasawi habang 117 ang naitalang sugatan sa naganap na bakbakan sa pagitan ng grupong Al Shabaab at Somali Security Forces.
Ayon sa isang Army officer, nagsimula ang siege noong Biyernes ng gabi at natapos nitong linggo ng umaga.
Sinalakay ng naturang grupo ang Hayat Hotel, na itinuturing na unang terror attack sa Mogadishu, mula nang maupo si Hassan Sheikh Mohamud noong Mayo.
Nahirapan ang mga otoridad na masugpo ang grupo dahil sa hawak nitong mga hostage, na pawang mga sibilyan.
Napinsala rin ang malaking bahagi ng gusali dahil sa matinding sagupaan.
Sinabi naman ni Health Minister Dr. Ali Haji Adam na posibleng madagdagan pa ang bilang ng death toll dahil may ilang biktima na posibleng hindi na naisugod sa ospital.