Muling ipinaalala ng Davao City Police Office (DCPO) ang mga ‘‘Do’s and Dont’s” sa araw ng panunumpa bukas ni incoming Vice President Sara Duterte Carpio sa Davao City.
Ayon kay DCPO Spokesperson, Maj. Maria Teresita Gaspan, ipapatupad bukas ang lahat ng existing city ordinance sa Davao City kagaya na lamang ng mandatoryong pagsusuot ng face mask.
Habang ipinagbabawal na rin ang pagdadala ng backpack pati na ang pagsusuot ng jacket.
Hindi rin papayagan ang mga drone, maliban na lamang sa mga una nang nakakuha ng security clearance.
Sa ngayon, pagtitiyak ni Gaspan na walang natatanggap na kahit anumang seryosong banta ang lungsod pero hindi pa rin sila magpapakampante.
Aabot sa 4, 076 security personnel ang ide-deploy sa mismong araw ng panunumpa ni Duterte-Carpio.
Handa naman ang lahat ng miyembro ng Davao PNP, mga grupong nakasailalim sa kanila at iba pang security counterparts para sa naturang Oath-taking ceremony.
Nagpapatuloy din ang monitoring, peace build-up upang maiwasan ang anumang hindi kanais-nais na pangyayari sa mismong panunumpa ng susunod na Pangalawang Pangulo ng Pilipinas.
