Tiniyak ng Office of the Civil Defense (9OCD) at ng National Disaster Risk Reduction & Management Council (NDRRMC) ang kanilang pakikipag-ugnayan sa iba’t ibang ahensya ng Pamahalaan.
Ito’y para matugunan ang pangangailangan gayundin ay matiyak ang kaligtasan ng mga residenteng apektado ng pag-aalburuto ng bulkang Taal.
Kasalukuyang nakataas ang Alert Level 3 sa bulkan matapos na magbuga muli ito ng nasa 400 hanggang 800 metrong usok bunsod ng magmatic unrest.
Batay sa datos ng NDRRMC, nasa 869 na pamilya o katumbas ng 2, 961 na indibiduwal ang inilikas at kasalukuyang tumutuloy sa may 12 Evacuation Centers partikular na sa mga bayan ng Agoncillo at Laurel sa Batangas.
Kasabay nito, patuloy na pinaalalahanan ng NDRRMC ang lahat na gawin ang ibayong pag-iingat at sumunod lagi sa abiso ng mga awtoridad upang agad maikasa ang kinakailangang paglilikas. —ulat mula kay Jaymark Dagala (Patrol 9)
