Naniniwala si Partido Federal ng Pilipinas standard bearer Ferdinand ‘Bongbong’ Marcos Jr. na mas mabilis na makakabangon ang ekonomiya ng bansa kung mauunawaan ng mga pilipino ang kahalagahan ng pagpapabakuna kontra COVID-19 upang makamit ang ‘herd immunity’.
Sa panayam kay Marcos sa programa ni Boy Abunda, ibinahagi niya na iniisip ng Uniteam ang ‘jab to jobs’ bilang isa sa kanilang pangunahing programa na makakatulong para makaahon ang bansa sa nararanasang pandemya.
Sa huling datos ng DOH-IATF National COVID-19 Vaccination Dashboard, nasa 58 milyong pilipino pa lamang ang nakatanggap ng kumpletong bakuna na medyo malayo pa sa 70 milyong target ng gobyerno para makamit ang herd ummunity.
Ipinaliwanag din ni Marcos na dapat nating maabot ang kalagayan ng ibang bansa kung saan ay bakunado na ang halos lahat ng indibidwal at itinuturing na parang isang ordinaryong flu na lamang ang Omicron variant.
Maliban dito, sinabi niya na mahalaga rin na pasiglahin ang micro, small and medium enterprises (MSMEs) upang makapagbigay ng trabaho sa mga indibidwal na naapektuhan ng pandemya.
Isinusulong din ni Bongbong ang paglalaan ng prayoridad sa sektor ng agrikultura at turismo na matulungan sila sa pamamagitan ng Public Private Partnership (PPP).
Samantala, nauunawaan rin ni Bongbong na may ilan pang indibidwal na takot at ayaw magpabakuna.
Dahil dito, sinabi ni Marcos na hindi sila maaaring pilitin ngunit hindi rin dapat na tumigil ang gobyerno sa pangungumbinsi.