Mananatiling sarado ang Minor Basilica of the Black Nazarene o Quiapo Church hanggang sa January 26 dahil pa rin sa tumataas na kaso ng COVID-19 sa Metro Manila.
Inihayag ni Mon Senior Hernando Coronel, Rector at Parish Priest ng Quiapo Church, na palalawigin ng simbahan ang pagsasara nito mula January 13 hanggang 26 upang mapigilan ang pagkalat ng virus sa bansa.
Kaugnay nito, suspindido rin ang mga aktibidad na nauugnay sa simbahan habang patuloy naman ang mga Daily online masses sa mga opisyal na Social Media Account ng simbahan.
Aniya, sa dalawang linggong pagsasara, magsasagawa na rin ng disinfection at sanitation sa mga opisina at simbahan para masiguro ang kaligtasan ng bawat isa.
Una nang inihayag ng Quiapo Church ang pagsasara nito mula January 3 hanggang 6.
Itinigil din nito ang tradisyunal na Traslacion para maiwasan ang pagkalat ng sakit sa mga deboto.
