Masyado pang maaga para sa Philippine National Police (PNP) na ituring na election related ang nangyaring pananambang sa Zamboanga laban sa 2 Alkalde ng Basilan kamakailan.
Ayon kay PNP Spokesman P/Col. Rhoderick Alba, bagaman hindi nila ito ini-aalis ay makabubuting tapusin muna ang ginagawang imbestigasyon bago sila maglabas ng anumang pahayag.
Sa ngayon ay naghihintay pa sila ng pinakabagong ulat mula sa Police Regional Office 9 o Zamboanga Regional PNP hinggil sa itinatakbo ng ginagawa nilang imbestigasyon.
Magugunitang tinambanagan ng 4 na salaring sakay ng motorsiklo sina Akbar, Basilan Mayor Alih Sawal Sali at Al-Barka Mayor Darussalam Lajid nuong Lunes sa Seaside, Brgy. Baliwasan sa Zamboanga City.
Dead on Arrival sa ospital si Mayor Lajid gayundin ang driver nitong nakilalang si Barad Nuruddin habang nalagay sa kritikal na kundisyon si Mayor Sali. —sa ulat ni Jaymark Dagala (Patrol 9)
