Na-doble ang hinagpis ng dalawang pamilya sa Pampanga nang magkapalit ang bangkay ng kanilang mga kaanak sa punerarya.
Ang bangkay ng ginang na kinilalang si Imelda Rome na balak pa sanang paglamayan ng kanyang pamilya, nailibing na ng mga kaanak ng isang pumanaw na lolo.
Pumanaw dahil sa komplikasyon sa baga si Rome sa Mount Carmel Hospital sa San Fernando City at mula sa pagamutan ay pinuntahan siya ng mga kaanak sa punerarya upang makuha at maiburol.
Gayunman, walang pangalan ang cadaver bag nang nadatnan ni Jerlie Britanico kaya’t nang pabuksan ay isang matandang lalaki ang bumungad sa kanya sa halip na ang ateng si Imelda.
Aminado mismo ang mga guwardiya ng punerarya na nagkapalit anya ang bangkay at inakala ng pamilya ng matandang lalaki, na ang kanilang lolo ang nasa ataul na hindi na pinabuksan at agad ipinalibing dahil COVID-19 positive ito.
Dumulog na ang dalawang pamilya sa pampanga provincial government habang humingi na ng paumanhin ang ospital at punerarya na nangakong makikipagtulungan. —sa panulat ni Drew Nacino
