Arestado ng mga operatiba ng Bureau of Immigration o BI ang tatlong korean nationals na sangkot sa illegal gambling sa bansa.
Kinilala ni Immigration Commissioner Jaime Morente ang tatlo na sina Cho Chang Joo, Beom Dawon at Hong Changwoo
Naaresto ang tatlo sa kanilang tinutuluyang condo unit sa Brgy. San Lorenzo, lungsod ng Makati sa bisa naman ng mission order.
Nabatid na may kinahaharap na warrant of arrest ang tatlo mula sa Busan District Court sa South Korea dahil sa naturang kaso.
Nabunyag din na deklarado nang undocumented alien ang tatlo makaraang kanselahin ng gobyerno ng Korea ang kanilang pasaporte.
Ikinakasa na ang deportation laban sa tatlo at isasama rin sa blacklist ng ahensya upang hindi na sila muling makapasok pa sa bansa.
