Nahaharap sa patumpatong na reklamo at namemeliro pang masibak sa serbisyo ang isang Pulis at 4 na miyembro ng Truck Ban Traffic Management Office ng Apalit, lalawigan ng Pampanga.
Ito’y makaraang mahuli sa aktong tumatanggap ng “tong” mula sa mga truck driver na dumaraan sa harap ng isang Gasolinahan sa panulukan ng Quezon Road at Mc Arthur Highway sa may San Simon Exit ng North Luzon Expressway kaninang umaga.
Kinilala ni Philippine National Police – Integrity Monitoring and Enforcement Group o PNP- IMEG Director P/BGen. Thomas Frias Jr. ang Pulis na sangkot na si P/Cpl. Leomar Calegan at ang mga Traffic Personnel na sina Marlon de Guzman, Menard Mendoza, Michael Maniulit at Noel Manarang.
Nakuha sa mga suspek ang 800 libong pisong cash na sinasabing nakolekta ng grupo mula sa mga Truck Driver na dumaraan sa lugar sa nakalipas na magdamag.
Kasalukuyan nang hawak ng IMEG Luzon Field Unit ang mga naaresto habang isasampa na ang mga kasong Graft, paglabag sa Code of Conduct and Ethical Standards at Robbery/Extorsion.