Target ng pamahalaan na mabakunahan kontra COVID-19 ang nasa humigit kumulang 2 milyong medical frontliners sa bansa bago ang kalagitnaan ng taong kasalukuyan.
Ito’y ayon kay Vaccine Czar Sec. Carlito Galvez matapos ihayag nito na sa mga medical frontliner pa rin nakalaan ang mga darating na bakuna ngayong buwan hanggang sa Abril.
Giit ni Galvez, mahalagang mabakunahan agad ang mga medical frotnliner bilang pagsunod na rin sa kautusan ni Pangulong Rodrigo Duterte at rekumendasyon naman ng National Immunization Technical Advisory Group (NITAG).
Pebrero a-28 nang dumating sa bansa ang unang batch ng bakunang Coronavax ng kumpaniyang Sinovac mula China at inaasahang darating ngayong buwan ang ikalawang batch nito.
Habang nitong Huwebes, Marso 4 dumating ang mga bakunang AstraZeneca sa bansa mula sa United Kingdom na bahagi ng biniling bakuna ng Pilipinas mula sa Covax Facility.