Nilinaw ng Malakaniyang na hindi kasama sa Bayanihan Law ang pagpapatupad ng rent freeze sa mga apartment at condominium habang nasa gitna ng pandemya ng COVID-19 ang bansa.
Ayon kay Presidential Spokesman Harry Roque, sa halip ay pinapayagan ng batas ang pagpapalawig sa ibinibigay na palugid sa pagbabayad ng renta.
Layon nito ani Roque, na maibsan ang pinapasang hirap ng mga pilipino na lubhang naapektuhan ang kabuhayan dahil sa pandemya.
Dagdag pa ng kalihim, maaaring sumandal sa batas ang mga low income tenants dahil ipinagbabawal nito ang pagpapataw ng sobrang taas na singil sa upa.
Magugunitang umapela si Pangulong Rodrigo Duterte sa mga landlord na huwag palayasin ang kanilang tenants na mabibigong makabayad ng renta sa oras lalo na’t nasa ilalim pa rin community quarantine ang bansa.