Patay ang apat na miyembro ng Wara-Waray kidnap for ransom group sa Quezon City kahapon ng madaling araw.
Ito’y matapos mauwi sa engkuwentro ang dapat sana’y rescue operation ng mga tauhan ng Philippine National Police – Anti Kidnapping Group (PNP-AKG) sa harap ng UP Town Center sa nabanggit na lungsod.
Ayon kay PNP-AKG Director P/BGen. Jonnel Estomo, nabisto ang hideout ng mga kidnapper nang magpadala sila ng mensahe kay Li Cheng na kaibigan ng biktimang si Zhi Fu na nuo’y lumapit sa mga pulis para magpasaklolo.
Sa pamamagitan ng mobile messaging app na Wechat, humingi ng P20 milyong ransom ang mga suspek para sa kalayaan ng biktima.
Dito na ikinasa ng mga pulis ang rescue operations kung saan, sumiklab ang bakbakan at duon na napatay ang mga suspek na kidnaper at nasagip ang biktima.
