Itinanggi ng Malakaniyang na tinatakot ang Philippine Red Cross (PRC) na hahanap na lamang ng kapalit matapos tanggihan ang installment basis na paraan ng pagbabayad ng PhilHealth ng kanilang utang.
Ayon kay Presidential Spokesperson Harry Roque, walong private laboratories ang kinakausap ngayon ng Department of Health para saluhin ang coronavirus disease 2019 (COVID-19) testing ng PRC.
Paliwanag ni Roque, wala namang magagawa ang gobyerno kung hindi maipipilit sa PRC na ipagpatuloy ang testing kahit pa 50% ang babayaran sa utang ng PhilHealth.
Giit ni Roque walang pananakot na nangyayari kundi kailangan lang talagang humanap ng alternatibo para hindi maapektuhan ang mga Pinoy na kailangang isailalim sa test.
