Binalaan ng isang opisyal ng AFP ang mga artistang anito’y nagdididikit sa makakaliwang grupo.
Partikular na tinukoy ni Lt. General Antonio Parlade Jr. pinuno ng National Task Force to End Local Communist Armed Conflict (NTL-ELCAC) ang aktres na si Angel Locsin na aniya’y may koneksyon sa leftist gayundin sina Liza Soberano at 2018 Miss Universe Catriona Gray.
Binigyang diin ni Parlade sa facebook page ng task force na hindi malayong mapahamak sina Soberano at Gray kung hindi didistansya sa makakaliwang grupo at pinayuhan ang mga ito na huwag sumunod sa yapak ng kapatid ni Angel na si Ella Colmenares na nag-underground at bahagi ng NPA-Quezon.
Hindi naman aniya NPA si Soberano subalit kailangan itong mabigyan ng leksyon tungkol sa gawain ng Makibaka na underground mass organization na nagtatago sa ilalim ng Gabriela Women’s Partylist na kinakaibigan ng aktres.
Una nang naging kontrobersyal ang pagsali ng Kapamilya actress sa webinar ng Gabriela bilang suporta sa pagsusulong ng mga karapatan ng mga kababaihan.
