Binatikos ni Senate Minority Leader Franklin Drilon ang patuloy na kabiguan ng Department of Budget and Management (DBM) na ipalabas ang pondong nakalaan sa ilang mga ahensiya sa ilalim ng Bayanihan 2.
Ito ay matapos mabatid na hindi pa rin naipalalabas ang nakalaang budget ng Departments of Tourism at Agriculture sa ilalim ng naturang batas.
Dahil dito, kinuwestiyon ni Drilon kung hindi ba available ang P14-bilyong pondo para sa Bayanihan 2.
Sinabi ni Drilon, noong ipinasa nila ang naturang batas, kanila namang inilimita ang budget sa itinakdang ceiling ng Department of Finance.
Dagdag ng senador, hindi rin kapani-paniwalang nagpabaya at hindi pa nakapagsumite ng special budget request sina Agriculture Secretary William Dar at Tourism Secretary Bernadette Romulo-Puyat.
Binigyang diin pa ni Drilon, mahalagang maipalabas agad ng DBM ang pondo sa ilalim ng Bayanihan 2 dahil nakatakda itong mapaso sa ika-19 ng Disyembre. —ulat mula kay Cely Ortega-Bueno (Patrol 19)