Nangunguna pa rin sina Pangulong Rodrigo Duterte at aktres na si Angel Locsin bilang pinakahinahangaang lalaki at babae sa Pilipinas ngayong 2020.
Batay ito sa taunang survey na isinagawa ng British research at analytics firm na YouGov.
Anila, nakakuha si Pangulong Duterte ng 19.67% na admiration score habang 15.30% naman kay Locsin.
Mas mataas ito sa nakuha nilang 19.39% at 11.14% noong nakaraang taon kung saan nakuha rin ng dalawa ang pinakamataas na ranggo.
Pumangalawa naman sa listahan ng mga lalaki si Senador Manny Pacquiao na nakakuha ng 10.65% na score habang pumangatlo naman si Manila Mayor Isko Moreno sa score na 7.96%.
Sa listahan naman ng mga babae, pumangalawa si miss Universe 2018 Catriona Gray sa score na 11.09% at sinundan ng mang-aawit na si Sarah Geronimo sa score na 7.48%.
Nasa pang-anim na ranggo naman ang aktres na si Liza Soberano na nanguna sa survey noong 2018 habang nasa ika-15 si Vice President Leni Robredo.
